पश्चिम एसिया युद्धको प्रभाव: सुनसरी–मोरङ औद्योगिक क्षेत्रमा उत्पादन लागत बढ्यो, ढुवानी भाडामा तीव्र वृद्धि

पश्चिम एसियामा भइरहेको युद्धको असर नेपालका उद्योगहरूमा प्रत्यक्ष रूपमा पर्न थालेको छ, विशेषगरी सुनसरी–मोरङ औद्योगिक क्षेत्रमा उत्पादन लागत तीव्र रूपमा बढेको उद्योगीहरूले बताएका छन्। सिपिङ कम्पनीहरूले ‘फोर्स मेजर’ को नाममा प्रतिकन्टेनर १५ सयदेखि २ हजार डलरसम्म ढुवानी भाडा बढाए पनि कच्चा पदार्थ समयमै आइपुगेको छैन। पश्चिम एसिया मा जारी तनाव, विशेषगरी स्ट्रेट अफ हर्मुज क्षेत्रमा जोखिम बढेपछि कच्चा पदार्थको आपूर्ति अवरुद्ध भएको उद्योगीहरूको भनाइ छ। यसको असर प्लास्टिक प्याकेजिङ सामग्री, पेट्रोलियम पदार्थ र प्लास्टिक दानाको मूल्यमा परेको छ, जसका कारण औद्योगिक उत्पादन लागत कम्तीमा ८ देखि १० प्रतिशतसम्म बढेको छ। उद्योगीहरूका अनुसार तीन सातामै प्लास्टिक प्याकेजिङ सामग्रीको मूल्य ५० प्रतिशतसम्म बढेको छ भने ढुवानी, खाद्यान्न, दाल, तेल र दैनिक उपभोग्य वस्तुको मूल्यसमेत उकालो लागेको छ। इरान, इजरायल र अमेरिका बीचको तनावका कारण कच्चा पदार्थको ढुवानी प्रभावित हुँदा उद्योग र सर्वसाधारण दुवै मारमा परेका छन्।