३ दिनको गिरावटपछि नेप्से २५ सयको रेखामा, ठूला ब्रोकर निरन्तर खरिदमै

नेप्से सूचक सोमबार पनि ओरालो लाग्दै १५.५४ अंकले घटेर २५९४.१३ अंकमा झरेको छ। तर, कारोबार रकम अघिल्लो दिनको तुलनामा बढेर ६ अर्ब ६५ करोड रुपैयाँभन्दा बढी पुगेको छ। लगातार ३ दिनको गिरावटपछि नेप्से २५ सयको मनोवैज्ञानिक रेखामुनि झरेको छ, जसले लगानीकर्ताहरूमा अन्योलता र शंका पैदा गरेको छ।

सोमबार ३२२ कम्पनीका १ करोड ३८ लाखभन्दा बढी कित्ता सेयर किनबेच भएको छ। एनआरएन इन्फ्रास्टक्चर एन्ड डेभलपमेन्ट कम्पनी २५ करोड रुपैयाँको कारोबारसहित अग्रस्थानमा रह्यो। दोस्रो र तेस्रो स्थानमा क्रमशः न्यादी हाइड्रोपावर र हिमालयन पावर पार्टनर परेका छन्।

पुस महिनाको अन्तिम दिन बजारमा दबाब महसुस गरिएको छ। ठूला र मध्यमस्तरका लगानीकर्ताहरूले कर्जाको साँवा–ब्याज, कर तिर्ने, र आफ्नो हिसाबकिताब मिलाउने काममा व्यस्त हुँदा बजारमा विक्री दबाब देखिएको विश्लेषण गरिएको छ। अल्पकालीन व्यापारीहरूले (ट्रेडरहरू) मुनाफा बुक गर्न थालेका कारण बजार ओरालो लागेको हो।

बैंकहरूले पुस महिनाको ब्याजदरलाई माघ महिनामा पनि निरन्तरता दिने निर्णय गरेका छन्। यसले ब्याजदर थप बढ्ने अवस्था नरहेको संकेत गरे पनि दोस्रो त्रैमासमा बैंकहरूको खराब कर्जा अनुपात (एनपीए) बढ्न सक्ने त्रासका कारण लगानीकर्ताहरूमा असन्तोष देखिएको छ।

तर, बैंकिङ प्रणालीमा तरलता पर्याप्त रहेको र ब्याजदर घट्दो क्रममा रहेकोले बजारले आगामी दिनमा सुधार गर्ने सम्भावना रहेको विश्लेषण गरिएको छ। सेयर धितो कर्जामा २०% को वृद्धि भएकाले लगानीकर्ताहरूको बजारप्रतिको विश्वास अझै कायम रहेको देखिन्छ।

नेप्से सूचकले हाल २५५६ को महत्त्वपूर्ण सपोर्ट र २६४७ को रेसिस्टेन्स स्तरमा संघर्ष गरिरहेको छ। पछिल्ला महिना बजारले ‘लोअर हाई’ (LH) र ‘लोअर लो’ (LL) बनाउँदै आएको थियो। तर, केही समयअघि बजारले ‘चेन्ज अफ क्यारेक्टर’ (CHoCH) को संकेत देखाएको थियो।

यदि बजारले २६४७ अंकमाथि तोड्न सक्यो भने लगानीकर्ताहरूले खरिदको अवसरका रूपमा लिन सक्ने प्राविधिक विश्लेषकहरूको सुझाव छ। यस्तो अवस्थामा बजार क्रमशः २७०० र २८०० अंकसम्म पुग्न सक्ने सम्भावना रहेको छ। तर, यदि बजार २५५६ अंकको सपोर्ट तोड्न असफल रह्यो भने, थप गिरावटको जोखिम रहन्छ।

बजारमा दोहोरो अंकको गिरावट देखिए पनि ठूला ब्रोकरहरूले खरिदलाई निरन्तरता दिएका छन्। यसले ठूला लगानीकर्ताहरूले पुनः बजारमा प्रवेश गर्न थालेको संकेत गर्दछ।

• ब्रोकर ५८ ले ४४ करोड ३३ लाखको सेयर खरिद गर्दा २७ करोड ४६ लाखको विक्री गरेको छ।

• ब्रोकर ४ ले ३७ करोड ३६ लाखको खरिद गर्दा १७ करोड २५ लाखको विक्री गरेको छ।

• ब्रोकर २८ ले २३ करोड ७२ लाखको खरिद गर्दा २२ करोड ८० लाखको विक्री गरेको छ।

बजार लामो समयदेखि साइडवेजमा घुमिरहेको छ। आगामी दिनमा दोस्रो त्रैमासका वित्तीय विवरणले बजारको गति निर्धारण गर्ने अपेक्षा गरिएको छ। विश्लेषकहरूले लगानीकर्ताहरूलाई सबल वित्तीय सूचक भएका कम्पनीहरू छान्न र योजनाबद्ध रूपमा लगानी गर्न सुझाव दिएका छन्।

मंगलबारको बजारको प्रतिक्रिया र प्राविधिक चार्टहरूले बजारको आगामी दिशा स्पष्ट पार्नेछन्। हाल लगानीकर्ताहरूले धैर्य अपनाउँदै बजार सुधारको प्रतीक्षा गर्नु उपयुक्त हुनेछ।