अबिरल वर्षा र बाढीपहिरोका कारण सुपरमाई हाइड्रोपावरको विद्युत उत्पादन स्थगित

इलाम । सुपरमाई हाइड्रोपावर लिमिटेड (SMH) ले आफ्नो ७.८ मेगावाट क्षमताको सुपरमाई जलविद्युत् आयोजनाबाट विद्युत उत्पादन अस्थायी रूपमा स्थगित गरेको छ । माई नदी आसपासको क्षेत्रमा आएको अबिरल वर्षा, बाढी र पहिरोका कारण आयोजना संरचनामा क्षति पुगेर विद्युत् उत्पादन बन्द गर्नुपरेको कम्पनीले जनाएको छ ।

कम्पनीका अनुसार, असोज १८ गते (अक्टोबर ४, २०२५) राति परेको भीषण वर्षाले माई नदीमा आएको बाढी र पहिरोका कारण आयोजना प्रभावित भएको थियो । त्यसका कारण उही राति करिब १०:४५ बजेबाट विद्युत् उत्पादन पूर्ण रूपमा बन्द गरिएको हो ।

हाल आयोजना क्षेत्रमा मर्मत तथा पुनःस्थापना कार्य जारी रहेको कम्पनीले जनाएको छ । सुपरमाई हाइड्रोपावरले सकेसम्म चाँडो उत्पादन पुनः सञ्चालन गर्ने प्रतिबद्धता व्यक्त गर्दै सरोकारवाला निकाय तथा लगानीकर्तालाई स्थिति सुधार भएपश्चात् आयोजना पुनः सञ्चालनको जानकारी औपचारिक रूपमा दिने बताएको छ ।

यस घटनाले इलाम क्षेत्रका अन्य जलविद्युत् आयोजनामा समेत असर पारेको र निरन्तर वर्षाका कारण क्षति मूल्याङ्कन र मर्मत कार्यमा केही समय लाग्ने अनुमान गरिएको छ ।