पर्यटन र हवाई क्षेत्रमा आईपीओ लहर, १७ कम्पनी तयारीमा

काठमाडौं — नेपालको पर्यटन तथा हवाई क्षेत्रले नयाँ लगानी चरणमा प्रवेश गर्ने संकेत देखिएको छ। धितोपत्र बजारमा चाँडै १७ वटा कम्पनीले प्राथमिक सार्वजनिक निष्कासन (आईपीओ) ल्याउने तयारी गरेसँगै पर्यटन पूर्वाधार विस्तारमा निजी क्षेत्रको लगानी उल्लेख्य रूपमा बढ्ने अपेक्षा गरिएको हो।धितोपत्र बोर्डमा आवेदन दिएका कम्पनीमध्ये तीनवटा पाँचतारे होटलले मात्रै ठूलो परिमाणमा सेयर निष्कासन गर्ने योजना बनाएका छन्। अकामा होटलले ४२ लाख ८५ हजार, वर्णवास म्युजियम होटलले ३९ लाख ६० हजार र होटल इच्छाले ३५ लाख कित्ता सेयर निष्कासन गर्ने तयारी गरेका छन्। यसले उच्चस्तरीय आवास सेवा विस्तारसँगै अन्तर्राष्ट्रिय पर्यटक लक्षित पूर्वाधार विकासमा टेवा पुग्ने देखिएको छ।होटल क्षेत्रमा मात्र नभई अन्य पर्यटन पूर्वाधारमा पनि लगानी विस्तार हुने संकेत देखिएको छ। अन्नपूर्ण केवलकार, मौलाकालिका केवलकार, नगरकोट रिसोर्ट, माउन्टेन ग्लोरी, होटल सबरिना, होलिडे इन एक्सप्रेस, अतिथि रिसोर्ट एण्ड स्पालगायतका कम्पनीहरूले पनि आईपीओ निष्कासनको तयारी गरेका छन्। यी परियोजनाहरूले नयाँ गन्तव्य विकास, पर्यटकीय पहुँच विस्तार र सेवा गुणस्तर उकास्न महत्वपूर्ण भूमिका खेल्ने अपेक्षा गरिएको छ।यसैबीच हवाई क्षेत्रमा पनि निजी लगानी विस्तार हुँदै गएको छ। श्री एयरलाइन्स, प्रभु हेलिकप्टर र कैलाश हेलिकप्टरले आईपीओ ल्याउने तयारी गरिरहेका छन्। हवाई सेवामा लगानी बढेसँगै दुर्गम तथा पर्यटकीय क्षेत्रहरूमा पहुँच सहज हुने र आन्तरिक पर्यटन थप सक्रिय बन्ने विश्वास गरिएको छ।विश्लेषकहरूका अनुसार पर्यटन क्षेत्रका यी आईपीओहरूले नेपालको अर्थतन्त्रलाई ‘पर्यटन–आधारित’ मोडेलतर्फ उन्मुख गराउन आधार तयार पार्नेछन्। पूर्वाधार विस्तार, सेवा गुणस्तर सुधार र पूँजी बजारमार्फत लगानीकर्ताको सहभागिता बढ्दै जाँदा पर्यटन क्षेत्र आगामी दिनमा अझ प्रतिस्पर्धी र आकर्षक बन्ने संकेत देखिएको छ।