(ALICL) एशियन लाइफ इन्स्योरेन्सले असार २५ गतेदेखि ४२ प्रतिशत हकप्रद शेयर निष्कासन गर्ने

एशियन लाइफ इन्स्योरेन्स कम्पनी लिमिटेडले यही असार २५ गतेदेखि ४२ प्रतिशत हकप्रद शेयर निष्कासन गर्ने भएको छ । कम्पनीले नेपाल धितोपत्र बोर्ड (सेबोन) बाट हाल कायम चुक्तापुँजीको अनुपातमा १ः०.४२ अर्थात् ४२ प्रतिशत हकप्रद शेयर निष्कासनको स्वीकृति पाइसकेको छ ।

यसअनुसार कम्पनीले प्रति कित्ता १०० रुपैयाँ अंकित दरमा कुल १ करोड ४२ लाख ७९ हजार ३१२.४८ कित्ता हकप्रद शेयर बिक्री गर्न लागेको हो ।

हकप्रद शेयरका लागि कम्पनीले जेठ १६ गते बुक क्लोज गरिसकेको छ, जसअनुसार जेठ १४ गतेसम्म कायम रहेका शेयरधनीहरू मात्र आवेदन दिन योग्य हुनेछन् । आवेदन दिन साउन १३ गते बैंकिङ समयसम्म मात्र समय दिइनेछ ।

हाल कम्पनीको चुक्ता पुँजी ३ अर्ब ३९ करोड ९८ लाख ३६ हजार ४०० रुपैयाँ रहेको छ भने हकप्रद बिक्रीपछि पुँजी ४ अर्ब ८२ करोड ७७ लाख ६७ हजार ६४८ रुपैयाँ पुग्नेछ ।

यस हकप्रद निष्कासन तथा बिक्री व्यवस्थापनको जिम्मा मुक्तिनाथ क्यापिटललाई दिइएको छ ।