‘घर निर्माण फेस्ट २०८२’ काठमाडौँमा हुँदै, २ सय करोडभन्दा बढीको कारोबार हुने अनुमान

नेपालको निर्माण क्षेत्रमा देखिएको सुस्ततालाई हटाउँदै बजारलाई पुनः सक्रिय बनाउन काठमाडौँमा ‘घर निर्माण फेस्ट २०८२’ आयोजना हुने भएको छ। घर निर्माण फाउन्डेसनको आयोजनामा पुस १२ देखि १५ गतेसम्म भृकुटीमण्डपमा फेस्ट सञ्चालन हुने छ।

नेपालमा निर्माण तथा व्यावसायिक गतिविधि विस्तार हुँदै गए पनि धेरै ब्रान्डहरू उत्पादनको प्रभावकारी प्रस्तुति, बजारमा स्थायी ब्रान्डिङ, र ग्राहकसँग प्रत्यक्ष सम्बन्ध विस्तारमा चुनौती भोगिरहेका अवस्थामा यो फेस्ट महत्वपूर्ण अवसरको रूपमा हेरिएको छ। फाउन्डेसनका अनुसार फेस्टले यी सबै चुनौतिहरूलाई सम्बोधन गर्ने लक्ष्य लिएको छ।

फेस्टमा सहभागी व्यवसायीहरूले प्रत्यक्ष अन्तरक्रिया, विशेषज्ञ मार्गदर्शन तथा ब्रान्डिङ परामर्शमार्फत आफ्ना उत्पादन र सेवाहरू लक्षित ग्राहकसम्म प्रभावकारी रूपमा पुर्‍याउन सक्नेछन्। मेलामा ४० हजारभन्दा धेरै दर्शकको उपस्थिति रहने अनुमान छ भने चार दिनमै २ सय करोड रुपैयाँभन्दा बढीको आर्थिक कारोबार हुने अपेक्षा आयोजकको छ।

एसियन पेन्ट्स, प्लम्बर पाइप, नेपोविट टायल्सलगायत निर्माण सामग्री क्षेत्रका ठूला कर्पोरेट हाउसहरूको सहभागिता रहने फेस्टले बीटुबी तथा बीटुसी दुवै प्रकारका सम्बन्ध विस्तारमा महत्वपूर्ण भूमिका खेल्नेछ। साथै, नवप्रवर्तनलाई प्रोत्साहन गर्न डोम हाउस टेक्नोलोजी, विश्व कीर्तिमानी इट्टा र अन्य अनौठा तथा आधुनिक आकर्षणहरू प्रदर्शन गरिनेछन्।

विशेष आकर्षणको रूपमा फाउन्डेसनद्वारा बनाइएको विश्वकै सबैभन्दा ठूलो आकारको इट्टालाई ‘गिनिज बुक अफ वर्ल्ड रेकर्ड’मा दर्ता गराउने तयारी भइरहेको आयोजकले जनाएको छ। यस्तै, ‘अपसाइड–डाउन हाउस’ अर्थात् उल्टो संरचनामा बनाइएको अनौठो घर पनि प्रदर्शन गरिनेछ।

डोम हाउस अवधारणाबाट एक दिनमै घर, होटल वा रिसोर्ट निर्माण गर्न सकिने प्रविधि पनि फेस्टमा प्रस्तुत गरिनेछ। फेस्टमा आउने दर्शकले इन्जिनियर, आर्किटेक्ट र निर्माण सामग्री विज्ञहरूसँग डिजाइन, गुणस्तर, लागत र आधुनिक प्रविधिबारे निःशुल्क परामर्श पाउने व्यवस्था मिलाइएको छ।

फाउंडेसनले फेस्टलाई सिर्जनशील, रोचक र नवप्रवर्तनयुक्त बनाउने लक्ष्य लिएको छ, जसले निर्माण उद्योग, उत्पादक र उपभोक्तालाई एउटै प्लेटफर्ममा जोड्दै समग्र निर्माण बजारलाई थप चलायमान बनाउने अपेक्षा गरिएको छ।