काबेली इनर्जी कम्पनी लिमिटेडद्वारा संस्थापक शेयर खुल्ला, प्रभावित क्षेत्रका जनताका लागि विशेष सुविधा

काबेली इनर्जी कम्पनी लिमिटेडले एक अर्ब पाँच करोड रूपैयाँ बराबरको संस्थापक शेयर खुल्ला गरेको छ। कम्पनीले शुक्रबार फुङलिङ बजारमा आयोजित पत्रकार सम्मेलनमार्फत संस्थापक शेयर निष्कासनबारे औपचारिक जानकारी गराएको हो।

कम्पनीले आयोजना प्रभावित जिल्ला ताप्लेजुङ र पाँचथरका लाभग्राहीका लागि न्यूनतम १० हजार रूपैयाँ बराबरको शेयर लगानीको व्यवस्था गरेको छ। जबकि यी दुई जिल्लाबाहेक अन्य जिल्लाका सर्वसाधारणका लागि न्यूनतम शेयर मूल्य एक लाख रूपैयाँ तोकिएको छ। कम्पनीका अनुसार आवश्यक पूँजी सङ्कलन भएसँगै संस्थापक शेयर भर्ने प्रक्रिया बन्द गरिनेछ।

काबेली इनर्जीले प्रभावित क्षेत्रका जनताले सहज रूपमा शेयरमा लगानी गर्न पाउँन् भन्ने उद्देश्यले ताप्लेजुङ र पाँचथरका नागरिकका लागि न्यूनतम लगानी सीमा न्यून राखिएको स्पष्ट पारेको छ।

कम्पनीका अनुसार ६२.६० मेगावाट क्षमताको उत्पादन आयोजना निर्माण भई विद्युत राष्ट्रिय प्रसारण लाइनमा जडान गरिने योजना छ। आयोजनाबाट आर्जन हुने आयमार्फत बैंक कर्जा तिर्ने तथा शेयरधनीलाई नियमित लाभांश वितरण गर्ने लक्ष्य राखिएको छ।

हाल निर्माणाधीन आयोजनालाई आगामी १५ महिनाभित्र सम्पन्न गर्ने तयारी भइरहेको कम्पनीले जनाएको छ। पाँचथरको याङवरक गाउँपालिका–६, पिप्लेमा निर्माण गरिएको २५ मेगावाट क्षमताको काबेली बी–१ जलविद्युत आयोजनाले २०७६ साल कात्तिक २३ गतेदेखि नै नियमित विद्युत उत्पादन गरिरहेको छ, जसलाई अमरपुर सब–स्टेशनमार्फत राष्ट्रिय प्रसारण लाइनमा जोडिएको छ।

यस्तै, व्यवसाय विस्तारको क्रममा काबेली इनर्जी कम्पनी र बुटवल पावर कम्पनी लिमिटेड साझेदारीमा काबेली नदीमा नै ३७.६० मेगावाट क्षमताको काबेली ए जलविद्युत आयोजना निर्माण गरिरहेका छन्। यसै आयोजनाको लागि हाल संस्थापक शेयर निष्कासन गरिएको कम्पनीले जनाएको छ।