नेप्सेमा पाँच कम्पनीको सेयर मूल्य समायोजन, आइतबारदेखि समायोजित मूल्यमा कारोबार शुरू

नेपाल स्टक एक्सचेन्ज (नेप्से) ले बिहीबार पाँच कम्पनीको सेयर मूल्य समायोजन गरेको छ। कृषि विकास बैंक, बरुण हाइड्रोपावर, सर्वोत्तम सिमेन्ट, ङादी पावर र शाइन रेसुंगा डेभलपमेन्ट बैंकले लाभांश वितरणका लागि बुक क्लोज गरेसँगै सेयर मूल्य समायोजन गरिएको नेप्सेले जनाएको छ।

नेप्सेका अनुसार कृषि विकास बैंकको बिहीबारको अन्तिम कारोबार मूल्य ३२८.९० रुपैयाँलाई आधार मानी ३.२५ प्रतिशत बोनस सेयर अनुसार मूल्य समायोजन गर्दा नयाँ मूल्य ३१८.५५ रुपैयाँ कायम भएको छ।

त्यस्तै, बरुण हाइड्रोपावरले ४.७५ प्रतिशत बोनस सेयर घोषणा गरेपछि यसको अन्तिम कारोबार मूल्य ३५३.९० रुपैयाँ आधारमा समायोजन भई नयाँ मूल्य ३३७.८५ रुपैयाँ कायम भएको छ।

सर्वोत्तम सिमेन्टले ५ प्रतिशत बोनस सेयर वितरण गर्ने निर्णय गरेपछि यसको सेयर मूल्य ९१३.९० रुपैयाँलाई आधार मानेर समायोजन भएको हो। समायोजनपछि नयाँ मूल्य ८७०.३८ रुपैयाँ निर्धारण गरिएको छ।

त्यसैगरी, ङादी पावरले पनि ५ प्रतिशत बोनस सेयर बुक क्लोज गरेपछि बिहीबारको ३९७.६० रुपैयाँ अन्तिम मूल्य आधारमा यसको समायोजित मूल्य ३७९.५७ रुपैयाँ कायम भएको छ।

शाइन रेसुंगा डेभलपमेन्ट बैंकको ३ प्रतिशत बोनस सेयरमा मूल्य समायोजन हुँदा नयाँ सेयर मूल्य ४११.६५ रुपैयाँ बनेको नेप्सेले जनाएको छ। बिहीबार यस बैंकको सेयर मूल्य ४२४ रुपैयाँमा बन्द भएको थियो।

समायोजन प्रक्रियासँगै यी कम्पनीका सेयरहरू आइतबारदेखि समायोजित मूल्यका आधारमा बजारमा कारोबार हुनेछन्।