नेप्से परिसूचक ३१ अंकले घट्दा कारोबार रकम ६ अर्बमा सिमित

साताको पहिलो कारोबार दिन आइतबार शेयर बजारमा गिरावट देखिएको छ। नेप्से परिसूचक ३१.१७ अंकले घटेर २७४९.८३ विन्दुमा बन्द भएको छ। त्यस्तै, सेन्सेटिभ इण्डेक्स ५.०३ अंक, फ्लोट इण्डेक्स २.३१ अंक र सेन्सेटिभ फ्लोट इण्डेक्स १.८४ अंकले घटेका छन्।
कारोबार रकम पनि यस दिन घटेर ६ अर्ब ६ करोड रुपैयाँमा सीमित रह्यो, जसअन्तर्गत ३२१ स्टकमा ९७ हजारभन्दा बढी पटकको कारोबारमार्फत १ करोड ४८ लाख कित्ता शेयर किनबेच भएको छ।

कम्पनीगत रूपमा, उन्नती सहकार्य लघुवित्तको मूल्य ६.७७% बढ्दै शीर्ष स्थानमा रह्यो भने आशा लघुवित्तको मूल्य ४% भन्दा बढी बढ्यो। तर ग्लोबल आइएमई समुन्नत योजना–२ नकारात्मक सर्किटमा झर्‍यो। कारोबार रकमका आधारमा नेपाल पुनर्बीमा कम्पनी ४५ करोड रुपैयाँभन्दा बढीको कारोबारसहित अग्रस्थानमा रह्यो, त्यसपछि हिमालयन रि इन्स्योरेन्स र हिमालयन डिष्टिलरी क्रमशः दोस्रो र तेस्रो स्थानमा रहे।

क्षेत्रगत सूचकांकमा १३ वटै उपसमूह घटेका छन्। विकास बैंक उपसमूह सर्वाधिक १.५९% ले घट्दा वित्त, होटल तथा पर्यटन, जलविद्युत, लगानी, बीमा, लघुवित्त र उत्पादनसमेत १% भन्दा बढीले ओरालो लागेका छन्।