राष्ट्र बैंकले ६० अर्ब रुपैयाँ बैंकिङ प्रणालीबाट खिच्दै

नेपाल राष्ट्र बैंकले तरलता व्यवस्थापनका लागि आज फेरि बैंकिङ प्रणालीबाट ६० अर्ब रुपैयाँ निक्षेप संकलन उपकरणमार्फत खिच्ने भएको छ। यसका लागि दिउँसो ३ बजे बोलकबोल प्रक्रिया सञ्चालन हुनेछ। इच्छुक बैंक तथा वित्तीय संस्थाले न्यूनतम १० करोड रुपैयाँदेखि आवेदन दिन सक्नेछन् भने बढीमा ५ करोडको गुणकमा बोलकबोल गर्नुपर्ने व्यवस्था गरिएको छ।

यस बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन्। निक्षेप संकलन ३१ दिनको अवधि रहनेछ र असोज १ गते साँवा तथा ब्याज भुक्तानी गरिने राष्ट्र बैंकले स्पष्ट पारेको छ। बहुब्याजदर प्रणालीमार्फत बोलकबोल गर्न सकिने भएकाले प्रतिस्पर्धात्मक दरमा कोष संकलन हुने अपेक्षा गरिएको छ।