सान्भी इनर्जीको आईपीओ सोमबार बाँडफाँट हुँदै, १० कित्ता मात्र २ लाख ४१ हजार आवेदकलाई पक्का
Author
NEPSE trading
सान्भी इनर्जी लिमिटेडले सर्वसाधारणका लागि निष्कासन गरेको प्राथमिक शेयर (आईपीओ) सोमबार दिउँसो ३ बजे बाँडफाँट हुने भएको छ। बिक्री प्रबन्धक नेपाल एसबीआई मर्चेन्ट बैंकिङ लिमिटेडका अनुसार, बाँडफाँट ठमेलस्थित कार्यालयबाट आयोजना गरिनेछ।
कम्पनीको आईपीओमा २१ लाख ८ हजार २३२ जना आवेदकले आवेदन दिएका थिए, जसअनुसार २ करोड ५८ लाख ९० हजार ६२० कित्ता शेयरको माग भएको छ। तर, उपलब्ध शेयर सीमित भएकाले केवल २ लाख ४१ हजार ५३० जना आवेदकलाई मात्र १० कित्ता शेयर वितरण हुने निश्चित भएको छ।
आईपीओको विवरण
सान्भी इनर्जीले प्रतिकित्ता रु. १०० अंकित दरमा ३७ लाख ९० हजार कित्ता साधारण शेयर नेपाल धितोपत्र बोर्डबाट स्वीकृति लिएर निष्काशन गरेको थियो।
८ लाख ८० हजार कित्ता आयोजनाबाट प्रभावित स्थानीयहरूका लागि
२ लाख ९१ हजार कित्ता वैदेशिक रोजगारीमा रहेका नेपालीहरूका लागि
यी दुवै समूहको शेयर पहिले नै निष्काशन भई बाँडफाँट भइसकेको छ।
अब बाँकी रहेको २६ लाख १९ हजार कित्ता सर्वसाधारणका लागि निष्काशन गरिएको हो।
अत्यधिक माग, भाग्यको खेल
माग अत्यधिक भएकाले बाँडफाँट लाटरी प्रणाली (lottery) मार्फत हुनेछ। जसमा भाग्यमानी करिब २ लाख ४१ हजार जनालाई मात्र न्यूनतम १० कित्ताका दरले शेयर प्राप्त हुनेछ, बाँकी करिब १९ लाखभन्दा बढी आवेदक खाली हात हुनेछन्।
