सम्पत्ति शुद्धीकरणसम्बन्धी सूचना नदिएको भन्दै ११ ब्रोकर कम्पनीलाई धितोपत्र बोर्डको कारबाही
Author
NEPSE trading
नेपाल धितोपत्र बोर्डले सम्पत्ति शुद्धीकरणसम्बन्धी अनिवार्य सूचना समयमा नपठाएका ११ ब्रोकर कम्पनीलाई कारबाही गरेको छ।
बोर्डका प्रवक्ता निरञ्जय घिमिरेका अनुसार, ब्रोकर कम्पनीहरूले सम्पत्ति शुद्धीकरणसम्बन्धी कार्यसम्पादनको अर्धवार्षिक प्रतिवेदन निर्धारण गरिएको समयसीमाभित्र नपठाएपछि पहिलो चरणको कारबाहीस्वरूप लिखित सचेत गराइएको हो। सम्बन्धित प्रतिवेदन सो अवधि समाप्त भएको १५ दिनभित्र पेश गर्नुपर्ने व्यवस्था रहेकोमा उनीहरूले त्यसको पालना नगरेको पाइएको हो।
गत २५ वैशाखमा बसेको बोर्डको सञ्चालक समितिको बैठकले कारबाही गर्ने निर्णय गरेको थियो। त्यसै निर्णयको आधारमा आइतबार सम्बन्धित कम्पनीहरूलाई कारबाहीको औपचारिक पत्र पठाइएको बोर्डले जनाएको छ।
कारबाहीमा परेका ब्रोकर तथा मर्चेन्ट कम्पनीहरू यस्ता छन्:
ब्लुचिप सेक्युरिटिज
प्रोपर्ट विजार्ड
स्टक्स्कार्टस् सेक्युरिटिज
सुमेरु सेक्युरिटिज
रोड्सो सेक्युरिटिज
सगरमाथा सेक्युरिटिज
इन्फिनिटी सेक्युरिटिज
म्याग्नेट सेक्युरिटिज एन्ड इन्भेस्टमेन्ट कम्पनी
एलिट मर्चेन्ट क्यापिटल
रिलायबल इन्भेस्टमेन्ट एन्ड मर्चेन्ट क्यापिटल
रिलायबल भेन्चर क्यापिटल
बोर्डले स्पष्ट रूपमा चेतावनी दिएको छ कि आगामी दिनमा यस्तै लापरवाही दोहोरिएमा विद्यमान कानुनबमोजिम जरिवाना तथा थप कडा कारबाही गरिनेछ।
धितोपत्र बजारमा पारदर्शिता र दायित्वको सुनिश्चितता कायम राख्न बोर्डले यस्ता नियमनकारी कदमहरू चालेको हो।
