माछापुच्छ्रे एसआईपी योजनाको इकाइ बिक्री आजदेखि खुला

एमीबिएल सामूहिक लगानी कोषअन्तर्गत सञ्चालन हुने ‘माछापुच्छ्रे एसआईपी योजना’को इकाई बिक्री आजदेखि औपचारिक रूपमा खुला गरिएको छ। कोष प्रवद्र्धक माछापुच्छ्रे बैंक र योजना व्यवस्थापक माछापुच्छ्रे क्यापिटल रहेको यस योजनामा पहिलो चरणमै कुल २ करोड इकाइ निष्कासनका लागि आवेदन खुला भएको हो।

यस सामूहिक लगानी योजनाको कुल आकार ५ करोड इकाइ रहेको छ। जसमध्ये १५ प्रतिशत अर्थात् ७५ लाख इकाइ कोष प्रवद्र्धक तथा योजना व्यवस्थापकका लागि सुरक्षित राखिएको छ। सुरक्षित वितरणमध्ये ७० लाख इकाइ (१४%) माछापुच्छ्रे बैंकका लागि र ५ लाख इकाइ (१%) माछापुच्छ्रे क्यापिटलका लागि छुट्टाइएको छ। बाँकी इकाइहरू आम लगानीकर्ताले खरिद गर्न सक्नेछन्।

लगानीकर्ताले न्यूनतम १०० इकाइदेखि अधिकतम २० लाख इकाइसम्मका लागि आवेदन दिन सक्ने व्यवस्था छ। आवेदन नेपाल धितोपत्र बोर्डबाट अनुमति प्राप्त आस्वा सदस्य बैंक तथा वित्तीय संस्थाका सबै शाखाबाट दिन सकिनेछ।

यस योजनाको इकाइ बिक्री छिटोमा मंसिर १७ गते र ढिलोमा मंसिर २८ गते बैंकिङ समयभित्र बन्द हुने जनाएको छ। बिक्री तथा निष्काशन व्यवस्थापक माछापुच्छ्रे क्यापिटल नै रहनेछ।

हाल सामूहिक लगानी कोषप्रति लगानीकर्ताको चासो बढिरहेको सन्दर्भमा सार्वजनिक गरिएको ‘माछापुच्छ्रे एसआईपी योजना’ले बजारमा नयाँ वैकल्पिक लगानी अवसर प्रदान गर्ने अपेक्षा गरिएको छ।