करेक्शन फेज कि नयाँ गिरावटको सुरुवात? बजारमा लगानीकर्ता अन्योलमा

नेपाल स्टक एक्सचेञ्ज (नेप्से) मा सूचीकृत अधिकांश कम्पनीहरूले चौथो त्रैमासको वित्तीय विवरण सकारात्मक रूपमा सार्वजनिक गरिरहेका छन्। नाफा, प्रतिशेयर आम्दानी (EPS), सञ्चालन आम्दानी लगायतका वित्तीय सूचकहरूमा उल्लेखनीय सुधार देखिए पनि बजार भने त्यसको विपरीत दिशातर्फ उन्मुख भएको छ।

मंगलबारको कारोबारमा नेप्से परिसूचक ४१.७८ अंकले घटेर २८३३.५७ विन्दुमा झरेको छ। लगानीकर्ताको मनोबलमा गहिरो असर पारेको यो गिरावटलाई धेरैले ‘करेक्शन फेज’ का रूपमा लिएका छन् भने केही विश्लेषकहरू यसलाई नयाँ डाउनट्रेंडको सुरुवातको संकेत मानेर चेतावनी दिइरहेका छन्।

माछापुच्छ्रे बैंकको बलियो नाफा वृद्धि

आजै सार्वजनिक गरेको वित्तीय विवरणअनुसार माछापुच्छ्रे बैंकले गत आर्थिक वर्षमा ९२.४५ प्रतिशतले नाफा बढाएको छ। बैंकको प्रतिशेयर आम्दानी दोब्बर पुगेको छ। बैंकको अपरेटिङ प्रॉफिट, नेट इन्ट्रेस्ट इनकम र कमिसन आम्दानी सबै सूचकमा सुधार देखिएको छ।

त्यस्तै, एक दर्जनभन्दा बढी लघुवित्त कम्पनी तथा केही विकास बैंकहरूले पनि विगत वर्षको तुलनामा उल्लेखनीय नाफा आर्जन गरेका छन्। धेरै म्युचुअल फण्डहरूले लाभांश समेत घोषणा गरिसकेका छन्। समग्रमा वित्तीय क्षेत्रको अवस्था बलियो देखिए पनि बजारको प्रतिक्रिया कमजोर देखिएको छ।

बजार घट्नुका मुख्य कारणहरू

एकातर्फ, धेरै लगानीकर्ताले शेयर मूल्य बढेपछि मुनाफा सुरक्षित गर्न प्रोफिट बुकिङ थालेका छन्, जसले बजारमा बिक्रीको चाप बढाएको छ। अर्कातर्फ, लघुवित्त कम्पनीको लाभांश सीमा पुनरावलोकनबारे स्पष्ट नीति अझै सार्वजनिक नभएकाले लगानीकर्तामा अनिश्चितता कायम छ।

नेपाल राष्ट्र बैंकले मौद्रिक नीतिमा लघुवित्तको लाभांश सीमा पुनरावलोकन गर्ने भने पनि अहिलेसम्म कार्यान्वयन नभएकाले बजारमा अन्यौलता झनै बढेको हो। यसैबीच लघुवित्त कम्पनीहरूका शेयरहरूमा उतारचढाव बढेको छ, जुन जोखिमको संकेत पनि हो।

ISIN नम्बर विवादले थपिएको तनाव

हालै निजी क्षेत्रका केही जलविद्युत कम्पनीहरूले संस्थापक र सर्वसाधारण शेयरलाई छुट्टाछुट्टै ISIN नम्बर दिने सिडिएससीको प्रस्तावको विरोध गरिरहेका छन्। यता, सर्वसाधारण लगानीकर्ताहरू भने यस प्रस्तावको समर्थनमा देखिएका छन्। यस विषयमा विवाद बढिरहेकाले बजारमा थप तनाव सिर्जना भएको छ।

उपसमूह र कारोबार विश्लेषण

मंगलबारको दिन नेप्सेमा जम्मा ९ अर्ब ३३ करोड रुपैयाँबराबरको कारोबार भएको छ, जुन सोमबारको ११ अर्ब रुपैयाँको तुलनामा कम हो। १३ उपसमूहमध्ये ११ उपसमूहमा गिरावट देखिएको छ भने लघुवित्त र म्युचुअल फण्ड उपसमूहमा सामान्य सुधार भएको छ।

यस दिन समाज लघुवित्त वित्तीय संस्था र उन्नति सहकार्य लघुवित्तको शेयर सकारात्मक सर्किट लेभलमा कारोबार भएको छ। यसले लघुवित्तको सम्भावनालाई देखाए पनि लाभांश नीतिबारे स्पष्टता नहुदाँ लगानीकर्ता अझै सतर्क देखिन्छन्।

स्टक विश्लेषण: गिरावट र शीर्ष कारोबार

थ्रि स्टार हाइड्रोपावरको शेयरमूल्य १० प्रतिशतले घटेर सबैभन्दा धेरै गिरावट आएको स्टक रह्यो। कारोबार रकमको आधारमा हिमालयन रि इन्स्योरेन्स कम्पनी शीर्ष स्थानमा रह्यो, जसको कारोबार ३९.२८ करोड रुपैयाँ पुगेको छ। त्यसपछि ट्रेड टावर (३७ करोड+) र शिवम् सिमेन्ट्स (३३ करोड+) ले क्रमशः दोस्रो र तेस्रो स्थान ओगटेका छन्।

प्राविधिक विश्लेषण: समर्थन र प्रतिरोध क्षेत्र

नेप्से परिसूचक ३००० विन्दु नजिक पुगेपछि ओरालो लाग्नु प्राविधिक रूपमा एक प्रतिरोध क्षेत्र ब्रेक गर्न नसकेको संकेत हो। विश्लेषकहरूका अनुसार बजार हाल करेक्शन फेज मा छ कि नयाँ डाउनट्रेंड सुरु भएको हो भन्ने विषयमा अझै निष्कर्षमा पुग्न सकिएको छैन।

हाल बजारको प्रमुख समर्थन क्षेत्र २७८०–२८०० विन्दु मानिएको छ। यदि यो समर्थन क्षेत्र ब्रेक हुन्छ भने बजार थप ओरालो लाग्ने सम्भावना प्रबल देखिन्छ। त्यसले लगानीकर्ताको मनोबलमा गम्भीर असर पार्न सक्छ।

ब्रोकर विश्लेषण: खरिद–बिक्री प्रवृत्ति

आजको बजारमा १० ठूला ब्रोकरमध्ये ६ वटा ब्रोकरले तुलनात्मक रूपमा बढी बिक्री गरेका छन् भने ४ वटा ब्रोकरले बढी खरिद गरेका छन्।

उदाहरणस्वरूप, केपीसीएल (PCL) मा ब्रोकर ५८ बाट २ लाख १७ हजार कित्ता शेयर खरिद र २ लाख ४४ हजार कित्ता शेयर बिक्री भएको देखिन्छ। ग्लोबल आइएमई बैंकमा ब्रोकर ८९ बाट १ लाख ७ हजार कित्ता खरिद र ब्रोकर ६० बाट २ लाख कित्ता बिक्री भएको छ। यसरी एउटै स्टकमा एउटै ब्रोकरबाट बाई र सेल भएकोले म्याचिङ कारोबार को आशंका गरिएको छ।

नेपाल स्टक बजारको पछिल्लो अवस्था हेर्दा वित्तीय सूचकहरू बलिया भए पनि बजार दबाबमा छ। प्रोफिट बुकिङ, लाभांश विवाद, ISIN नम्बर बहस, र प्राविधिक रूपमा प्रतिरोध क्षेत्रको असरले बजार अस्थिर देखिएको छ।

अब लगानीकर्ताले जल्दबाजीमा निर्णय नगरी, समर्थन क्षेत्र र प्राविधिक सूचकहरू हेरेर बुझेर लगानी रणनीति बनाउनु आवश्यक छ। बजार स्थायीत्वमा फर्किने कि गहिरो गिरावटतर्फ जाने भन्ने निक्र्योल आगामी केही दिनको प्राविधिक ट्रेन्डले निर्धारण गर्नेछ।