आयोजना प्रभावित स्थानीयका लागि बन्दीपुर केवलकारको आईपीओमा आवेदन दिने आज अन्तिम दिन

बन्दीपुर केवलकार एण्ड टुरिजम लिमिटेडले आयोजना प्रभावित क्षेत्रका स्थानीय बासिन्दाका लागि साउन ६ गतेदेखि खुला गरेको आईपीओमा आवेदन दिन आज साउन २० गते अन्तिम दिन हो। कम्पनीले ५ लाख ६६ हजार कित्ता साधारण शेयर प्रति कित्ता १०० रुपैयाँ दरमा निष्काशन गरेको हो, जुन ५ करोड ६६ लाख रुपैयाँ बराबरको हुन्छ।

यस आईपीओमा तनहुँ जिल्लाको बन्दीपुर गाउँपालिका, आँबुखैरेनी गाउँपालिका, भानु नगरपालिका वडा नं. १ र गोरखा जिल्लाको पालुङ्गटार नगरपालिका वडा नं. ७ का स्थानीय बासिन्दाले आवेदन दिन सक्नेछन्। न्यूनतम १० कित्ता र अधिकतम २० हजार कित्तासम्म आवेदन दिन पाइनेछ। केयर रेटिङ नेपालले कम्पनीलाई “CARE-NP BB” रेटिङ दिएको छ, जसले औषत जोखिम रहेको जनाउँछ।

कम्पनीको आयोजनाको लागत ३ अर्ब ८५ करोड रुपैयाँ छ भने लगानी फिर्ता हुने अनुमानित अवधि ८.२२ वर्ष र छुटमा फिर्ता हुने अवधि १०.५ वर्ष रहेको छ। शेयर बिक्री प्रबन्धक नेपाल एसबिआई मर्चेण्ट बैंकिङ लिमिटेड हो।