अमेरिकामा अर्थमन्त्री खनाल र एडीबी अध्यक्षबीच भेटवार्ता, नेपालका परियोजनाबारे छलफल

विश्व बैंकको वार्षिक बैठकमा सहभागी हुन अमेरिकामा रहनुभएका अर्थमन्त्री रामेश्वरप्रसाद खनालले बुधबार एसियाली विकास बैंक (ADB) का अध्यक्ष मासातो कान्डासँग भेटवार्ता गर्नुभएको छ।

भेटका क्रममा नेपालमा एडीबीको सहयोगमा सञ्चालन भइरहेका परियोजनाहरूको प्रगति, उपलब्धि र हालका चुनौतीहरूका बारेमा विस्तृत रूपमा छलफल भएको वासिङ्टनस्थित नेपाली राजदूतावासले जनाएको छ।

भेटमा नेपालका लागि अमेरिकास्थित राजदूत लोकदर्शन रेग्मी, दूतावासका आर्थिक कन्सुलर युगराज पाण्डे, भ्रमण टोलीका सदस्यहरू तथा एडीबीका उच्च अधिकारीहरू सहभागी थिए।

बैठकमा नेपालको आर्थिक सुधार, पूर्वाधार विकास, र लगानी वातावरण सुधारका विषयमा पनि चर्चा गरिएको जनाइएको छ।

नेपालले एडीबीसँग ऊर्जा, सडक, शिक्षा, र जल व्यवस्थापनजस्ता क्षेत्रमा दीर्घकालीन सहकार्य गर्दै आएको छ, र यस भेटलाई दुई पक्षबीचको साझेदारी सुदृढ गर्ने अवसरका रूपमा हेरिएको छ।