सानीभेरी जलविद्युत् आयोजनाको वित्तीय व्यवस्थापन सम्पन्न
Author
NEPSE TRADING
काठमाडौं – एक्पर्ट हाइड्रो इन्भेस्टमेन्ट कम्पनीले निर्माण गर्ने ४४.५२ मेगावाट क्षमताको सानीभेरी जलविद्युत् आयोजनाको वित्तीय व्यवस्थापन सम्पन्न भएको छ। उक्त आयोजनामा सिटिजन्स बैंक इन्टरनेसनल लिमिटेडको नेतृत्वमा विभिन्न बैंक तथा वित्तीय संस्थाले लगानी गर्ने भएका छन्।
बैंकहरूको लगानी
सम्झौताअनुसार सिटिजन्स बैंकले रु २ अर्ब ५० करोड, नविल बैंकले रु १ अर्ब ५० करोड, नेपाल इन्भेस्टमेन्ट मेगा बैंकले रु १ अर्ब २० करोड, सानिमा बैंक र सिद्धार्थ बैंकले समान रु १ अर्ब–१ अर्ब लगानी गर्नेछन्।
सम्झौता हस्ताक्षर
सोमबार भएको द्विपक्षीय सम्झौतामा एक्पर्ट हाइड्रो इन्भेस्टमेन्टका प्रबन्ध निर्देशक सन्तोषराज नेपाल र सिटिजन्स बैंकका प्रमुख कार्यकारी अधिकृत गणेशराज पोखरेलले सम्झौतापत्रमा हस्ताक्षर गरेका हुन्।
लागत र संरचना
आयोजनाको कुल लागत रु ९ अर्ब ६० करोड रहनेछ। जसमा २५ प्रतिशत स्वपुँजी र ७५ प्रतिशत ऋणबाट आवश्यक पूँजी जुटाइने प्रबन्ध निर्देशक नेपालले जानकारी दिएका छन्।
स्थान र निर्माण अवधि
यो आयोजना रुकुमपूर्वको पुथाउत्तरगङ्गा गाउँपालिका–७ र १४ मा निर्माण हुने छ। करिब ४२ महिनाभित्र आयोजना सम्पन्न गर्ने लक्ष्य राखिएको छ।
उत्पादन र विद्युत् खरिद
नदी प्रवाही प्रकृतिको यस आयोजनाबाट वार्षिक २८३.३७ गिगावाट घण्टा बिजुली उत्पादन हुनेछ। उत्पादित विद्युत् बाफीकोट सवस्टेशनमा जोडिनेछ।
आयोजनाले यसअघि नै नेपाल विद्युत् प्राधिकरणसँग विद्युत् खरिद सम्झौता (PPA) गरिसकेको छ। सो सम्झौता वि.सं. २०८० असार २७ गते सम्पन्न भएको हो।
