स्थानीय बजारमा सुनको मूल्यमा तीन हजारको गिरावट, चाँदी पनि सस्तो

नेपाली बजारमा आज सुनको मूल्यमा उल्लेख्य गिरावट आएको छ। नेपाल सुनचाँदी व्यवसायी महासङ्घका अनुसार आज एक तोला सुनको मूल्य ३ हजार रुपैयाँले घटेर १ लाख ९० हजार ७०० रुपैयाँमा कायम भएको छ। शुक्रबारको तुलनामा यो गिरावट ठूलो मानिएको छ।

सुनसँगै चाँदीको मूल्य पनि घटेको छ। आज एक तोला चाँदी ५ रुपैयाँले घटेर २ हजार १४५ रुपैयाँमा कारोबार भइरहेको छ।

अन्तर्राष्ट्रिय बजारमा पनि सुनको दर घट्दो क्रममा देखिएको छ। विभिन्न अन्तर्राष्ट्रिय सञ्चारमाध्यमहरूका अनुसार आज एक औंस सुनको मूल्य ३,३११ अमेरिकी डलर कायम भएको छ।

सुनचाँदीको मूल्य घटेसँगै सुन बजारमा किनबेचको चहलपहल केही बढ्ने अनुमान व्यवसायीहरूले गरेका छन्।