सरकारले आज १० अर्बको विकास ऋणपत्र बिक्री गर्दै, आन्तरिक ऋण उठाउने तालिका सार्वजनिक

सार्वजनिक ऋण व्यवस्थापन कार्यालयले आज साउन ७ गते १० अर्ब रुपैयाँ बराबरको तीन वर्षे ‘विकास ऋणपत्र–२०८५’ बोलकबोल प्रक्रियाबाट बिक्री गर्दैछ। बिहान १० बजेदेखि अपराह्न ३ बजेसम्म बोलकबोल हुने र नेपाल स्टक एक्सचेञ्जमा दोस्रो बजार कारोबार समेत हुने छ। अर्धवार्षिक ब्याजसहित आयकर लाग्ने यो ऋणपत्र धितो राखी कर्जा लिन सकिनेछ।

यस वर्ष सरकारले कुल ३ खर्ब ६२ अर्ब आन्तरिक ऋण उठाउने लक्ष्य राखेको छ। साउनदेखि असोजसम्म १ खर्ब १३ अर्ब, कात्तिकदेखि पुससम्म ८५ अर्ब, माघदेखि चैतसम्म १ खर्ब ९ अर्ब र वैशाखदेखि असारसम्म ५५ अर्ब आन्तरिक ऋण उठाइनेछ।

यस अन्तर्गत विकास ऋणपत्र, ट्रेजरी बिल, नागरिक बचतपत्र र वैदेशिक रोजगार बचतपत्र बिक्री गरिनेछ। हालको बजेटमा राजस्व, आन्तरिक तथा बाह्य ऋण र अनुदान गरी १९ खर्ब ६४ अर्ब बराबरको खर्च व्यवस्थापन गरिने उल्लेख छ।