झापा इनर्जी लिमिटेडले साउन १४ गतेदेखि आईपीओ निष्कासन गर्दै

झापा इनर्जी लिमिटेडले आगामी साउन १४ गतेदेखि आयोजना प्रभावित स्थानीय बासिन्दा र वैदेशिक रोजगारीमा रहेका नेपालीहरूका लागि आईपीओ निष्कासन गर्न लागेको छ।

नेपाल धितोपत्र बोर्डबाट असार ३१ गते अनुमति पाएअनुसार कम्पनीले प्रतिकित्ता १०० रुपैयाँ दरमा जम्मा ९ लाख ५० हजार ४७५ कित्ता शेयर सार्वजनिक निष्कासन गर्नेछ। त्यसमा आयोजनाबाट प्रभावित क्षेत्रका स्थानीयका लागि ३ लाख ८० हजार १९० कित्ता र वैदेशिक रोजगारमा रहेका नेपालीका लागि ५७ हजार २९ कित्ता शेयर छुट्याइएको छ।

आयोजना प्रभावितमध्ये १ लाख ९० हजार ९५ कित्ता शेयर आयोजनास्थल झापा, शिवसताक्षी नगरपालिका–४ को १०० मिटरभित्र बस्नेहरूका लागि र बाँकी १ लाख ९० हजार ९५ कित्ता सो क्षेत्रबाहिरका स्थानीयहरूका लागि छुट्याइएको छ।

न्यूनतम १० कित्ता र अधिकतम ५ हजार कित्तासम्म आवेदन दिन पाइनेछ। आवेदन फाराम हिमालयन बैंकका दूधे, दमक, सुरुंगा शाखा र माछापुच्छ्रे बैंकको दमक, सुरुंगा शाखाबाट प्राप्त र बुझाउन सकिनेछ।

आयोजना प्रभावितका लागि आईपीओ आवेदन छिटोमा साउन २८ र ढिलोमा भदौ १२ गतेसम्म खुला रहनेछ भने वैदेशिक रोजगारीमा रहेका नेपालीहरूले साउन १८ गतेदेखि साउन २८ गतेभित्र आवेदन दिनुपर्नेछ।

धितोपत्र निष्कासन तथा बिक्री प्रबन्धकमा हिमालयन क्यापिटल लिमिटेड रहेको छ।