खानी खोला हाइड्रोपावरको १००% हकप्रद शेयर निष्काशन

खानी खोला हाइड्रोपावर कम्पनी लिमिटेड (KKHC) ले आज भदौ ३ गतेदेखि १०० प्रतिशत हकप्रद शेयर निष्काशन तथा बिक्री खुला गरेको छ। यसअघि असार २७ गते बुकक्लोज गरिसकेको कम्पनीले असार २६ गतेसम्म कायम शेयरधनीहरुलाई १ बराबर १ अनुपातमा हकप्रद दिने निर्णय गरेको हो। यस अन्तर्गत कम्पनीले कुल ४६ करोड ५७ लाख १४ हजार ३०० रुपैयाँबराबरका ४६ लाख ५७ हजार १४३ कित्ता हकप्रद शेयर बिक्रीमा ल्याएको छ।

यो हकप्रद शेयरमा आवेदन दिने अन्तिम मिति भदौ २३ गते तोकिएको छ। निष्काशनको रेटिङ्गमा इक्रा नेपालले कम्पनीलाई इक्राएनपी सिंगल बी प्रदान गरेको छ, जसले उच्च वित्तीय जोखिमको संकेत गर्दछ। बिक्री प्रबन्धकको जिम्मेवारी सिटिजन्स क्यापिटल लिमिटेडले लिएको छ। लगानीकर्ताले कुमारी बैंक र सिटिजन्स बैंकका विभिन्न शाखासहित आस्बा सदस्य बैंक तथा वित्तीय संस्थाबाट र ‘मेरो शेयर’ अनलाइनमार्फत आवेदन दिन सक्नेछन्।

हाल कम्पनीको चुक्ता पूँजी ४६ करोड ५७ लाख रुपैयाँ रहेकोमा, हकप्रद निष्काशनपछि पूँजी दोब्बर भई ९३ करोड १४ लाख रुपैयाँ पुग्नेछ। संकलित रकम ऋण भुक्तानी, ब्याज खर्च घटाउने, वित्तीय स्थिति मजबुत पार्ने र इक्विटी बढाउने प्रयोजनमा प्रयोग गरिने कम्पनीले जनाएको छ।