लक्ष्मी सनराइज बैंकको नाफा ४०.९७% ले वृद्धि, इम्पेरमेन्ट चार्ज घट्नु मुख्य कारण
Author
NEPSE TRADING
लक्ष्मी सनराइज बैंक लिमिटेड (LSL) ले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ । विवरणअनुसार बैंकको खुद नाफा उल्लेख्य रूपमा बढेको छ, जसको मुख्य कारण इम्पेरमेन्ट चार्जमा आएको ठूलो कमी हो ।
ब्याज आम्दानी घटेपनि नाफामा वृद्धि
असार मसान्त २०८२ सम्ममा बैंकले ४ अर्ब ११ करोड ६९ लाख रुपैयाँ खुद नाफा आर्जन गरेको छ, जुन अघिल्लो वर्षको २ अर्ब ९२ करोड रुपैयाँको तुलनामा ४०.९७ प्रतिशत बढी हो । यस अवधिमा बैंकको खुद ब्याज आम्दानी ७.९९ प्रतिशत घटेर १२ अर्ब ३६ करोड रुपैयाँबाट ११ अर्ब ३७ करोड रुपैयाँमा सीमित भए पनि इम्पेरमेन्ट चार्ज ३ अर्ब ५८ करोड रुपैयाँबाट घटेर १ अर्ब १८ करोड रुपैयाँमा झरेपछि सञ्चालन र खुद नाफा दुवैमा वृद्धि भएको हो ।
फि आम्दानी र सञ्चालन नतिजा
समीक्षा अवधिमा खुद फि तथा कमिशन आम्दानी १०.०५ प्रतिशत बढेर २ अर्ब १८ करोड रुपैयाँ पुगेको छ, जसले आम्दानी संरचनामा सकारात्मक योगदान पुर्याएको छ । कुल सञ्चालन आम्दानी भने १.५४ प्रतिशत घटेर १४ अर्ब ६८ करोड रुपैयाँमा सीमित भएको छ । तर, इम्पेरमेन्ट खर्चमा आएको ठूलाे कमीका कारण सञ्चालन मुनाफा ३८.५५ प्रतिशत बढेर ६ अर्ब ९ करोड रुपैयाँ पुगेको छ ।
प्रति सेयर आम्दानी र वितरणयोग्य नाफा
बैंकको प्रतिशेयर आम्दानी (EPS) ४ रुपैयाँ ९१ पैसाले बढेर १६ रुपैयाँ ९१ पैसा पुगेको छ । वितरणयोग्य नाफा ३ अर्ब ५ लाख रुपैयाँ पुगेको छ, जुन अघिल्लो वर्षको १ अर्ब २४ करोड रुपैयाँभन्दा दोब्बर भन्दा बढी हो । वितरणयोग्य प्रतिशेयर आम्दानी पनि ५ रुपैयाँ ३६ पैसाबाट बढेर १२ रुपैयाँ ३४ पैसामा पुगेको छ ।
वित्तीय स्थिति र पूँजी संरचना
बैंकको चुक्ता पूँजी ५ प्रतिशत बढेर २४ अर्ब ३४ करोड रुपैयाँ पुगेको छ । रिजर्भ तथा सरप्लस २१.८२ प्रतिशत बढेर २१ अर्ब ९ करोड रुपैयाँ पुगेको छ । निक्षेप संकलन ११.५९ प्रतिशत बढेर ३ खर्ब ६७ अर्ब रुपैयाँ पुगेको छ भने कर्जा प्रवाह ११.१७ प्रतिशत बढेर २ खर्ब ७५ अर्ब रुपैयाँ पुगेको छ ।
मूल्यांकन र वित्तीय सूचकांक
प्रति सेयर नेटवर्थ १८६ रुपैयाँ ६३ पैसा पुगेको छ भने मूल्य–आम्दानी अनुपात (P/E Ratio) १४.१२ गुणामा रहेको छ । पूँजी कोष/जोखिमयुक्त सम्पत्ति अनुपात १२.७३ प्रतिशतमा रहेको छ । खुद असुल गर्न नसकिने कर्जा (NPL) अनुपात ४.२५ प्रतिशत छ, जसले ऋण गुणस्तरमा ध्यान दिनुपर्ने देखाउँछ । बैंकको आधारदर १०.७५ प्रतिशतबाट घटेर ६.५० प्रतिशतमा झरेको छ भने ब्याज दर अन्तर ४.४२ प्रतिशतबाट घटेर ३.५१ प्रतिशतमा सीमित भएको छ ।
लक्ष्मी सनराइज बैंकको यो नाफा वृद्धि मुख्यतया इम्पेरमेन्ट चार्जमा आएको ठूलाे कमीका कारण सम्भव भएको हो, जसले ब्याज आम्दानी घटेपनि नाफा उल्लेख्य रूपमा बढाएको छ । फि आम्दानीमा आएको वृद्धि र खर्च नियन्त्रणको प्रभावले नतिजा थप सशक्त बनेको छ । आगामी वर्षमा ब्याज मार्जिन कायम राख्नु र सम्पत्ति गुणस्तर सुधार गर्नु बैंकको प्रमुख चुनौती हुनेछ ।
