विनियोजन विधेयकसहित विभिन्न विधेयकमाथि छलफल र निर्णयको तयारी

राष्ट्रिय सभाको बैठक आज बिहान ११:१५ बजे संसद भवन, नयाँ बानेश्वरमा बस्दैछ। संघीय संसद सचिवालयका अनुसार, आजको बैठकमा विनियोजन विधेयक, २०८२ अन्तर्गत उठेका प्रश्नहरूको जवाफ सम्बन्धित मन्त्रीहरूद्वारा प्रस्तुत गरिनेछ।

यस क्रममा राष्ट्रपति कार्यालय, उपराष्ट्रपति कार्यालय, प्रधानमन्त्री तथा मन्त्रिपरिषद् कार्यालय, राष्ट्रिय योजना आयोगको सचिवालयलगायत विभिन्न मन्त्रालयहरूका शीर्षकमाथि संसदमा भएको छलफलपछि उठेका जिज्ञासाहरूको लिखित तथा मौखिक जवाफ दिने कार्यसूची तय गरिएको छ।

यस्तै, उपप्रधानमन्त्री तथा अर्थमन्त्री विष्णुप्रसाद पौडेलले प्रतिनिधिसभाबाट सन्देशसहित प्राप्त विनियोजन विधेयक, २०८२ लाई पारित गरियोस् भन्ने प्रस्ताव राष्ट्रिय सभामा प्रस्तुत गर्ने छन्। साथै, उनले ‘आर्थिक विधेयक, २०८२’ र ‘राष्ट्र ऋण उठाउने विधेयक, २०८२’ माथि विचार गरियोस् भन्ने प्रस्ताव पनि पेश गर्नेछन्।

त्यस्तै, अर्थमन्त्री पौडेलले ‘भन्सार विधेयक, २०८०’ लाई पारित गरियोस् भन्ने प्रस्ताव राख्ने कार्यसूची समेत रहेको संघीय संसदका महासचिव पद्यमप्रसाद पाण्डेयले जानकारी दिएका छन्।

यसका अतिरिक्त, राष्ट्रिय सभाका सचिव सुरेन्द्र अर्यालले ‘संघीय निजामती सेवा विधेयक, २०८०’ सम्बन्धी प्रतिनिधिसभाबाट प्राप्त सन्देश आजको बैठकमा टेबुल गर्ने तयारी गरिएको छ।

आजको बैठकले चालु आर्थिक वर्षको अन्त्यसँगै आगामी वर्षको बजेट कार्यान्वयनसँग सम्बन्धित कानुनी प्रक्रिया अगाडि बढाउने अपेक्षा गरिएको छ।