केन्द्रीय बैंकले थप ५५ अर्ब निक्षेप संकलन गर्दै, वित्तीय प्रणालीमा अधिक तरलताको चाप

वित्तीय प्रणालीमा अधिक तरलताको चाप यथावत रहेकाले नेपाल राष्ट्र बैंकले आज फेरि ५५ अर्ब रुपैयाँ निक्षेप संकलनमार्फत तरलता प्रशोचन गर्ने भएको छ। गत साउन ४ गते खिचिएको ५० अर्ब निक्षेप आज परिपक्व हुने भएकाले सोसँगै थप तरलता व्यवस्थापन गर्न लागिएको हो।

बैंक तथा वित्तीय संस्थाहरूमा लामो समयदेखि अधिक तरलता थुप्रिँदै आएको छ। ब्याजदर लगातार घटे पनि कर्जा प्रवाह सुस्त रहँदा राष्ट्र बैंकले पटक–पटक निक्षेप तानेर तरलता व्यवस्थापन गर्दै आएको छ। चालु आर्थिक वर्षको डेढ महिनामै राष्ट्र बैंकले ३ खर्ब ७८ अर्ब १० करोड रुपैयाँ निक्षेप संकलन गरिसकेको छ।

यसपटक राष्ट्र बैंकले निक्षेप संकलन उपकरणमार्फत २१ दिनका लागि ५५ अर्ब रुपैयाँ संकलन गर्ने जनाएको छ। अनलाइन बिडिङ सिस्टममार्फत दिउँसो ३ बजे हुने बोलकबोलबाट आवेदन पेस गर्न सकिनेछ। इच्छुक आवेदकले न्यूनतम १० करोड रुपैयाँदेखि बढीमा ५ करोडको गुणकमा आवेदन दिन सक्ने व्यवस्था गरिएको छ। यस निक्षेपको परिपक्वता तथा सावाँ–ब्याज भुक्तानी आगामी असोज ५ गते हुनेछ।

गत आर्थिक वर्षको मध्यतिरदेखि नै बैंकिङ प्रणालीमा देखिएको अधिक तरलता अहिले पनि यथावत छ। माग घट्नु र व्यवसायिक गतिविधि सुस्त हुनुका कारण बैंकहरुले अपेक्षितरूपमा कर्जा प्रवाह गर्न नसक्दा, अधिक तरलता व्यवस्थापन गर्न केन्द्रीय बैंकले निरन्तर दबाब झेल्नुपरेको छ।