लाभांश कार्यविधिमा खासै परिवर्तन छैन : लगानीकर्ता केशव कोइराला ‘काका’

काठमाडौं । नेपाल राष्ट्र बैंकले हिजो मात्र बैंक तथा वित्तीय संस्थाहरुको लागि लाभांश स्वीकृत गर्ने नयाँ कार्यविधि सार्वजनिक गरेको छ । यसबारेमा शेयर बजारका चर्चित लगानीकर्ता केशव कोइराला ‘काका’ले आफ्नो धारणा सार्वजनिक गर्दै कुनै ठूला नियमगत परिवर्तन नभएको टिप्पणी गरेका छन्।

उनका अनुसार, ‘क’ वर्गका वाणिज्य बैंक र ‘ख’ वर्गका राष्ट्रियस्तरका विकास बैंकहरुको लाभांश वितरण सम्बन्धी नियममा कुनै परिवर्तन गरिएको छैन । यसअघि जस्तै उनीहरुले बोनस वा नगद लाभांश वितरण गर्ने पुरानै प्रावधान कायम छ।

त्यस्तै, ‘ख’ वर्गका क्षेत्रीय विकास बैंक र ‘ग’ वर्गका फाइनान्स कम्पनीका हकमा बोनस शेयरमा लाग्ने कर तिर्ने प्रयोजनका लागि मात्र नगद लाभांश छुट्याउने पुरानै नियम यथावत् राखिएको छ। तर, नयाँ संशोधित कार्यविधिले यी संस्थाहरुलाई बोनस शेयरमा लाग्ने करभन्दा बढी नगद लाभांश वितरण गर्नुपर्ने व्यवस्था थपिएको उनले बताए।

सबैभन्दा उल्लेखनीय प्रावधान ‘घ’ वर्गका माइक्रोफाइनान्स संस्थाहरुका लागि छ। अबदेखि कुनै संस्थापकले २५% भन्दा बढी संस्थापक शेयर धारण गरेको अवस्थामा त्यस संस्थापकले बोनस वा नगद लाभांश पाउने छैनन्। सो लाभांश सम्बन्धित माइक्रोफाइनान्स संस्थाकै खातामा जम्मा हुने व्यवस्था गरिएको छ। तर, बाँकी शेयरधनीलाई यसले कुनै असर पार्दैन।

काकरुसार, यो कार्यविधिले सामान्य अद्यावधिक मात्र ल्याएको छ र लाभांश वितरणमा पुराना नियम नै ठूलो मात्रामा यथावत राखिएको छ।