(NTC) नेपाल टेलिकमको नाफामा ४८.६७% गिरावट, आम्दानी र राजस्व पनि घट्यो

काठमाडौं — नेपाल टेलिकम (नेपाल दूरसञ्चार कम्पनी लिमिटेड) ले चालु आर्थिक वर्ष २०८१ को तेस्रो त्रैमासको वित्तीय विवरण सार्वजनिक गरेको छ, जसअनुसार कम्पनीको मुनाफा, आम्दानी तथा राजस्वमा उल्लेखनीय गिरावट देखिएको छ।

वित्तीय विवरण अनुसार कम्पनीको वार्षिक नाफा अघिल्लो वर्षको तुलनामा ४८.६७% ले घटेर २ अर्ब ८४ करोड रुपैयाँमा झरेको छ, जुन गत वर्षको यसै अवधिमा ५ अर्ब ५५ करोड रुपैयाँ थियो। यो गिरावटले कम्पनीको संचालनमा चुनौतिहरू थपिएको देखाउँछ।

नाफा घट्नुमा प्रमुख कारणमध्ये एक वित्तीय आम्दानी (Finance Income) मा आएको भारी गिरावट हो, जुन ५ अर्ब १९ लाख रुपैयाँबाट घटेर २ अर्ब ८० लाख रुपैयाँमा झरेको छ, अर्थात् ४६.०२% ले गिरावट आएको हो। त्यस्तै, कम्पनीको मुख्य व्यापारिक आम्दानी (Revenue from Contract with Customers) पनि ०.६४% ले घटेर २५ अर्ब ३१ करोड रुपैयाँमा सीमित भएको छ।

कुल आम्दानीको हिसाबले हेर्दा, नेपाल टेलिकमको कुल आम्दानी ८.८९% ले घटेर ३१ अर्ब २० करोडबाट २८ अर्ब ४३ करोड रुपैयाँमा पुगेको छ। सबै प्रमुख आम्दानी स्रोतमा गिरावट आउँदा कम्पनीको समग्र आर्थिक प्रदर्शन कमजोर देखिएको छ।

इक्विटी शेयर पुँजी अघिल्लो वर्षको जस्तै १८ अर्ब रुपैयाँमै स्थिर रहेको छ भने रिजर्भ तथा सरप्लस ३.४०% ले घटेर ७५ अर्ब २६ करोडबाट ७२ अर्ब ७ करोड रुपैयाँमा झरेको छ, जसले कम्पनीको सञ्चित नाफा घटेको देखाउँछ।

शेयरधनीहरूको प्रतिफलका हिसाबले प्रति शेयर आम्दानी (EPS) ४१.०२ रुपैयाँबाट घटेर २१.०५ रुपैयाँ मा पुगेको छ। यस्तै प्रति शेयर नेटवर्थ पनि ५१२.९९ रुपैयाँबाट घटेर ५०३.९३ रुपैयाँ भएको छ। अहिले कम्पनीको PE अनुपात ४२.७४ रहेको छ, जुन हालको कमजोर आम्दानीको आधारमा उच्च मानिन्छ।

यो वित्तीय प्रदर्शनले नेपाल टेलिकमका लागि चुनौतीपूर्ण अवस्था देखाएको छ, जसबाट पार पाउन कम्पनीले आफ्नो आम्दानी वृद्धि गर्ने रणनीति अपनाउनुपर्ने देखिन्छ। लगानीकर्ताको विश्वास कायम राख्न कम्पनीले आगामी त्रैमासहरूमा सुधार गर्नु अत्यावश्यक छ।