भारतीय आयलको दर समायोजनसँगै नेपालमा पेट्रोल–डिजेल महँगियो, आजदेखि लागू

काठमाडौं — नेपाल आयल निगमले पेट्रोल, डिजेल र मट्टितेलको मूल्य वृद्धि गरेको छ। भारतीय आयल कर्पोरेसन (IOC) ले नेपाललाई पठाउने नयाँ मूल्य बढाएपछि निगम सञ्चालक समितिको बैठक बसेर आज मध्यरातिदेखि लागू हुने गरी मूल्य समायोजन गरेको हो।

निगमका अनुसार पेट्रोलको मूल्य प्रतिलिटर रु २ र डिजेल–मट्टितेलको मूल्य प्रतिलिटर रु ३ ले वृद्धि गरिएको छ। IOC ले पठाएको नयाँ खरिद मूल्यअनुसार पेट्रोलमा प्रतिलिटर रु २.५४ र डिजेलमा रु ६.५३ ले बढेकाले मूल्य समायोजन अपरिहार्य भएको निगमले स्पष्ट पारेको छ।

नयाँ मूल्यसूची

मूल्य वृद्धि लागू भएपछि डिजेल/मट्टितेलको खुद्रा मूल्य यसअनुसार हुनेछः

• पहिलो वर्ग: प्रतिलिटर रु १४४.५०

• दोस्रो वर्ग: प्रतिलिटर रु १४६

• तेस्रो वर्ग: प्रतिलिटर रु १४७

पेट्रोलको नयाँ खुद्रा मूल्यः

• पहिलो वर्ग: प्रतिलिटर रु १५८.५०

• दोस्रो वर्ग: प्रतिलिटर रु १६०

• तेस्रो वर्ग: प्रतिलिटर रु १६१

कहाँ कति वर्ग?

निगमले डिपोहरूलाई तीन वर्गमा विभाजन गरेको छ—

• पहिलो वर्ग: चारआली, विराटनगर, जनकपुर, अमलेखगन्ज, भलबारी, नेपालगन्ज, धनगढी, वीरगन्ज

• दोस्रो वर्ग: सुर्खेत र दाङ

• तेस्रो वर्ग: काठमाडौं, पोखरा, दिपायल

यसैको आधारमा प्रत्येक क्षेत्रका उपभोक्ताले फरक–फरक दरमा इन्धन किन्नुपर्नेछ। IOC ले नयाँ दर वृद्धि गरेपछि नेपालले पनि त्यसअनुसार मूल्य समायोजन गर्नुपरेको निगमको भनाइ छ। मूल्यवृद्धिले विशेषगरी यातायात तथा दैनिक उपभोग्य वस्तुको लागतमा थप दबाब पर्न सक्ने अनुमान गरिएको छ।