(PPL)पिपुल्स पावरको हकप्रद शेयरमा आवेदन दिने म्याद साउन २६ सम्म बढ्यो

पिपुल्स पावर लिमिटेड (PPL) ले असार २२ गतेदेखि निष्कासन तथा बिक्री खुला गरेको हकप्रद शेयरमा आवेदन दिने अवधि साउन २६ गतेसम्मका लागि थप गरेको छ। कम्पनीले १०:५ को अनुपातमा ५० प्रतिशत हकप्रद शेयर निष्कासन गरिरहेको छ।

यस अनुसार, कम्पनीले हाल कायम १० कित्ता शेयर बराबर नयाँ ५ कित्ता अनुपातमा ३१ लाख ६३ हजार कित्ता हकप्रद शेयर निष्कासन गर्दैछ, जसको कुल मूल्य ३१ करोड ६३ लाख रुपैयाँ छ। प्रति शेयरको अंकित मूल्य १०० रुपैयाँ निर्धारण गरिएको छ।

हकप्रद निष्कासनका लागि कम्पनीले असार २ गते बुक क्लोज गरेको थियो। तसर्थ, असार १ गतेसम्म नेप्सेमा कारोबार भई कायम रहेका शेयरधनीले मात्र आवेदन दिन सक्नेछन्।

केयर रेटिङ नेपालले यस हकप्रद निष्कासनका लागि कम्पनीलाई ‘CARE-NP BB’ रेटिङ प्रदान गरेको छ, जसले कम्पनीको वित्तीय दायित्व बहन गर्ने क्षमतामा औसत स्तरको जोखिम रहेको संकेत गर्दछ।