बजारमा प्रीपेड रियाक्सन: बजेटको पूर्वसन्ध्यामा नेप्सेमा उत्साहजनक सुधार

आगामी आर्थिक वर्षको बजेट प्रस्तुत हुनुअघि नेपाल स्टक एक्सचेन्ज (नेप्से) मा उल्लेखनीय सुधार देखिएको छ। लगानीकर्ताहरूले बजेट सकारात्मक आउने आशामा बजारले प्रीपेड रियाक्सन देखाएका छन्। बुधबार नेप्से परिसूचक १७.४४ अंकले बढेर २६९३.०६ विन्दुमा पुगेको छ। सेन्सेटिभ इन्डेक्स ४.२३, फ्लोट इन्डेक्स १.४८ र सेन्सेटिभ फ्लोट इन्डेक्स १.५९ अंकले उकालो लागेको छ। दिनभर स्थिर देखिएको बजार अन्तिम प्रहरमा बैंकिङ समूहको वृद्धिसँगै दोहोरो अंकले बढ्यो।

बजार विश्लेषकहरूका अनुसार, गभर्नर र अर्थमन्त्री बजारमैत्री रहेको धारणा बलियो बन्दै गएको छ। उनीहरूको भनाइमा, बजेटमा पूँजी बजार प्रवद्र्धन गर्ने नीति आएमा बजार अझ सशक्त रूपमा उकालो लाग्न सक्छ। कारोबार रकम ८ अर्ब ५८ करोड ६० लाख रुपैयाँ पुग्यो, जुन अघिल्लो दिनको ६ अर्ब ५२ करोडभन्दा उल्लेखनीय रूपमा बढी हो। पछिल्लो सुधारले बजारमा नयाँ ऊर्जा थपिएको छ। लगानीकर्ताहरूले पुँजीगत लाभकरलाई अन्तिम करको मान्यता दिने अपेक्षा गरेका छन्, जसले आत्मविश्वास बढाएको देखिन्छ।

ओम मेगाश्री फर्मास्यूटिकल्स र पियोर इनर्जीका शेयर सकारात्मक सर्किटमा कारोबार भए, भने ग्रिन डेभलपमेन्ट बैंकको शेयर ९.८५% ले बढ्यो। यता, बाराही हाईड्रोपावर ५.२६% र क्रिष्ट माईक्रो लाईफ इन्स्योरेन्स ५.१०% ले घट्यो। कारोबार रकममा ङादी ग्रुप पावर कम्पनी १ अर्ब ५ करोड ७३ लाख र राधी विद्युत कम्पनी ६० करोड ६ लाखसँग अग्रस्थानमा रह्यो। १३ मध्ये ८ उपसमूह बढेका छन्, जसमा विकास बैंक समूह १.७५% ले सर्वाधिक उकालो लाग्यो। फाइनान्स, जीवन बीमा, माइक्रोफाइनान्सलगायत ५ उपसमूह भने ओरालो लागे।

प्राविधिक विश्लेषणमा, पछिल्ला ६ क्यान्डलले २६६०-६५ को पिभोट क्षेत्रलाई निरन्तर परिक्षण गरे पनि ब्रेकडाउन हुन सकेको छैन। यी क्यान्डलहरूले २०० दिने मुभिङ एभरेजलाई सपोर्टको रूपमा लिएका छन्, तर डेथक्रस ओभर प्रभावमा छ। विश्लेषकहरू भन्छन्, यो स्तर कायम रहने हो भने सकारात्मक संकेत मिल्न सक्छ, तर २६६० तोडिएमा तलतिरको दबाब बढ्न सक्छ। लगानीकर्ताहरूको ध्यान अब बिहीबारको बजेटमा छ, जसले बजारमा दीर्घकालीन प्रभाव पार्ने अपेक्षा गरिएको छ।