राप्ती हाइड्रोको लिलामी शेयर साउन १३ गतेदेखि बिक्रीमा, साउन २० सम्म दररेटसहित आवेदन दिन सकिने

राप्ती हाइड्रो एन्ड जनरल कन्स्ट्रक्सन लिमिटेडले साउन १३ गते (मंगलबार)देखि अवितरित हकप्रद शेयर लिलामी प्रक्रियाबाट बिक्रीमा ल्याउने भएको छ।

कम्पनीले यसअघि असार १० देखि २४ गतेसम्म १:१ अनुपातमा ६१ लाख २७ हजार ९३८ कित्ता हकप्रद शेयर निष्काशन गरेको थियो, जसमा जेठ ५ गतेसम्म कायम रहेका शेयरधनीहरुले मात्रै आवेदन दिन पाउने व्यवस्था गरिएको थियो। सो क्रममा रीतपूर्वक आवेदन दिने लगानीकर्तालाई शेयर बाँडफाँट भइसकेको छ। बाँकी रहेको ७ लाख ४ हजार १११ कित्ता शेयर भने अब लिलामीमार्फत बिक्री गरिँदैछ।

कम्पनीले जानकारी गराएअनुसार, लिलामीमा आउनेमध्ये ५ लाख ६४ हजार १० कित्ता शेयर लकइनमा नरहेको समूहमा पर्छ भने बाँकी १ लाख ४० हजार १०१ कित्ता शेयर यही साउन ८ गतेसम्मका लागि लकइनमा रहनेछ।

शेयरको अंकित मूल्य प्रतिकित्ता १०० रुपैयाँ तोकिएको छ। इच्छुक व्यक्ति, कम्पनी वा संघसंस्थाले आफूले लिन चाहेको शेयरको दररेट खुलाइ साउन २० गतेभित्र गोप्य शिलबन्दी बोलपत्र पेश गर्नुपर्नेछ। न्यूनतम १०० कित्तादेखि अधिकतम सबै कित्तासम्मका लागि आवेदन दिन सकिनेछ।

बोलपत्र फाराम मुक्तिनाथ क्यापिटल लिमिटेडको प्रधान कार्यालय, नारायणचौर नक्साल काठमाडौं तथा मुक्तिनाथ विकास बैंकका देशभरिका विभिन्न शाखा—ठिमी, कुमारीपाटी, बिर्तामोड, विराटनगर, वीरगन्ज, जनकपुर, हेटौंडा, नारायणगढ, चिप्लेढुंगा, बागलुङ, घोराही, नेपालगन्ज, वीरेन्द्रनगर, धनगढी र महेन्द्रनगर—बाट प्राप्त गर्न तथा बुझाउन सकिनेछ।

लगानीकर्ताले प्रतिस्पर्धात्मक दरमा बोलपत्र बुझाउनु पर्नेछ, जसअनुसार उच्च दर बोल्ने आवेदकलाई प्राथमिकता दिइनेछ।