सन्तोष पौडेल भन्छन् : नेप्से छिट्टै ३२ सय विन्दु पार गर्छ, अहिले बेच्ने होइन कलेक्ट गर्ने समय हो

नेपालको पूँजी बजारमा पछिल्ला केही वर्षयता युवाहरूको आकर्षण उल्लेख्य रूपमा बढेको छ। नयाँ पुस्ता लगानीका प्रविधि, विचार र विश्लेषणका दृष्टिले अनुभवी पुस्तालाई चुनौती दिँदै अघि बढिरहेको छ।
त्यसै पंक्तिमा पर्दछन् — फास्ट लेन फण्ड इन्भेष्टमेन्ट कम्पनीका प्रमुख कार्यकारी अधिकृत (सिइओ) सन्तोष पौडेल।
केवल २६ वर्षको उमेरमा उनी पोखरालाई आफ्नो कार्यथलो बनाउँदै विगत पाँच वर्षदेखि निरन्तर रूपमा शेयर बजारमा सक्रिय छन्। पौडेल ट्रेडिङभन्दा दीर्घकालीन लगानीमा विश्वास गर्छन् र बजारको आधारभूत तर्कमा अडिग छन्।

नेप्से ट्रेडिङ डटकमका सम्पादक दिपेश घिमिरेले हालै उहाँसँग गरेको विस्तृत कुराकानी यहाँ प्रस्तुत गरिएको छ — जसमा बजारको वर्तमान अवस्था, आगामी सम्भावना, युवा पुस्ताको भूमिकादेखि व्यक्तिगत दृष्टिकोणसम्मका विषय समेटिएका छन्।

१. अहिले बजारको स्थिति र आगामी सम्भावना तपाईं कसरी हेर्नुहुन्छ ?

नेपालको शेयर बजार गत वर्षको तुलनामा अझै स्थिर देखिन्छ। जब अर्थमन्त्री विष्णु पौडेल नियुक्त भए, बजार १८ सय विन्दुबाट ३ हजार विन्दुसम्म पुगेको थियो। त्यो समय बजारमा आशा र उत्साह दुवै थियो।
तर पछिल्ला महिनाहरूमा सरकार परिवर्तन र नीति अस्थिरताले बजार साइडवेज (sideways) भयो।
अब भने नयाँ सरकारले ल्याउने नीति र राष्ट्र बैंकले जारी गरेका सकारात्मक सर्कुलरहरू बजारलाई फेरि बल प्रदान गर्ने अवस्थामा छन्।
म देख्छु — तिहारसम्म बजार साइडवेज रहनेछ र त्यसपछि ३२ सय विन्दु नाघ्ने बलियो सम्भावना छ।

२. ठ्याक्कै ३२ सय पुग्छ भनेर यति आत्मविश्वासका साथ भन्न सक्नुहुन्छ ?

अवश्य भन्न सक्छु। बजार हरेक पटक चक्रमा चल्ने गर्छ — करेक्सनपछि बुल फेज आउने नै गर्छ।
म ठोकुवा गर्छु, पुस–माघसम्म बजार ३२ सय पार गर्नेछ।
यो केवल अनुमान होइन, बजारको साइकलिकल हिस्ट्री, ट्रेडिङ भोल्युम, र निवेशक मनोविज्ञानको संयोजनमा आधारित अध्ययन हो।

३. विश्लेषकहरूको कुरा लगानीकर्ताले आजकल खासै पत्याउँदैनन् भन्ने आरोप पनि छ, तपाईंलाई के लाग्छ ?

म आफैंलाई “विश्लेषक” भन्दिनँ, म लगानीकर्ता हुँ।
नेपालमा धेरै “विश्लेषक” छन्, तर उनीहरूको पोर्टफोलियो सधैं नेगेटिभ हुन्छ। बजार घट्दा हल्ला फैलाउने, र बढ्दा डर देखाउने प्रवृत्ति हाबी छ।
कसैले बजार २२ सयमा झर्छ भनिरहेका छन् — म भन्छु, त्यस्तो नकारात्मक हल्लालाई पत्रकारहरूले पनि ठाउँ दिनु अपराध सरह हो।
हामीले लगानीकर्तामा डर होइन, आत्मविश्वास जगाउने समाचार लेख्नुपर्छ।

४. तपाईंको नजरमा कुन सेक्टरले बजारलाई माथि लैजाने सम्भावना बढी छ ?

लाइफ इन्स्योरेन्स, नन-लाइफ इन्स्योरेन्स, इन्भेष्टमेन्ट कम्पनीहरू, र केही उच्च फण्डामेन्टल भएका बैंक तथा अन्य कम्पनीहरूले बजारलाई बल दिनेछन्।
यी सेक्टरहरू अहिलेको आर्थिक वातावरणमा बढी प्रतिरोधी छन् र ब्याजदर, तरलता र नीति दुवै तर्फबाट सहयोगी अवस्थामा छन्।

५. तपाईं जेनजेड पुस्ताका लगानीकर्ता हुनुहुन्छ, अहिलेका युवाहरूले बजारमा राम्रो प्रदर्शन गरिरहेको चर्चा छ, तपाईंको दृष्टिकोण ?

म उमेरले जेनजेड हुँ, तर आन्दोलन गर्न होइन, बजारमा परिणाम देखाउन आएको व्यक्ति हुँ।
आजका युवाहरूले टेक्नोलोजी, मोबाइल एप्स र रियल-टाइम डेटाको प्रयोग गरेर आफूलाई सशक्त बनाएका छन्।
पुराना पुस्ताले सिकाएका आधारमा नयाँ पुस्ताले नयाँ सोच थपेको छ।
साँचो कुरा त के भने — आज बजारमा वास्तविक कमाउनेहरू यही नयाँ पुस्ता हुन्।
हामीले ज्ञान, अनुशासन र सही समयमा निर्णय लिन सिकेका छौं।

६. बजार घट्दा धेरै लगानीकर्ताले शेयर बेचिरहेका छन्, तपाईं के गर्दै हुनुहुन्छ ?

म त बेच्ने होइन, अहिले किन्नेको बेला हो भन्छु।
बजारले घट्ने जति घटिसक्यो। अहिले बजारमा भय छ, तर साँचो लगानीकर्ता भय देखेर भाग्दैन — भयलाई अवसरमा बदल्छ।
म अहिले बलिया कम्पनीका शेयर कलेक्ट गर्दैछु।

७. तपाईंका अनुसार यो समय बुल बजारकै फेज हो ?

हो, यो बुल बजार नै हो।
करेक्शन (Correction) आउँछ — तर त्यो बुल ट्रेन्ड भित्रकै सास फेर्ने समय हो, अन्त्य होइन।
नेपालको बजारले धेरैपटक यस्तै अवस्थामा नयाँ शिखर बनाएको छ।

८. यो बुल बजार कहिलेसम्म रहन्छ ?

म अनुमान गर्छु — यो बुल बजार ४१ सय विन्दु सम्म पुग्नेछ।
त्यसपछि बजारमा आंशिक करेक्सन आउला। त्यस बेलादेखि म थोरै-थोरै नाफा बुक गर्दै पोर्टफोलियो ब्यालेन्स गर्ने रणनीतिमा जानेछु।
तर अझै माथि पनि पुग्ने सम्भावना म नकार्दिनँ।

९. अन्त्यमा, आम लगानीकर्तालाई के सन्देश दिन चाहनुहुन्छ ?

अहिले फण्डामेन्टल र टेक्निकल दुवै दृष्टिले बलिया कम्पनीहरूमा लगानी गर्ने समय हो।
सस्तो मूल्यमा गुणस्तरीय कम्पनी किन्नु नै भविष्यको नाफा हो।
बजार घट्दा निराश होइन, धैर्य राख्नुहोस्।
बजार पुनः बलियो बुल फेजमा प्रवेश गर्नेछ भन्ने मेरो ठोकुवा हो।
अन्त्यमा, सबै लगानीकर्तालाई अग्रिम दिपावलीको शुभकामना — बजारमा उज्यालो ल्याउने जिम्मा हामी सबैको हो।

नेप्से ट्रेडिङको दृष्टि

सन्तोष पौडेल केवल युवा लगानीकर्ता मात्र होइनन्, उनी बजारको व्यवहार, मनोविज्ञान र मौद्रिक नीतिको तालमेल बुझ्ने गहिरो दृष्टि भएका व्यक्ति हुन्।
२६ वर्षकै उमेरमा यस्तो परिपक्व सोच राख्नु, र बजारमा दीर्घकालीन दृष्टीले हेर्न सक्नु, नयाँ पुस्ताका लागि प्रेरणादायी उदाहरण हो।
नेपालको पूँजी बजारमा नयाँ सोच, आत्मविश्वास र डिजिटल युगको मेल मिलाउने यस्तो लगानीकर्ता पुस्ताको उदयले भविष्यमा बजार अझ पारदर्शी र परिपक्व बन्ने अपेक्षा गर्न सकिन्छ।