शिवम् सिमेन्टको वार्षिक नाफा तीन गुणा बढ्दै ७९ करोड ४१ लाख रुपैयाँ पुग्यो

काठमाडौं, साउन २८ — शिवम् सिमेन्टको नाफा गत आर्थिक वर्षमा तीन गुणाले बढेको छ। कम्पनीले सार्वजनिक गरेको चौथो त्रैमासिक वित्तीय विवरणअनुसार खुद नाफा ७९ करोड ४१ लाख रुपैयाँ पुगेको छ, जुन अघिल्लो वर्षको सोही अवधिमा २५ करोड ९६ लाख रुपैयाँ मात्र थियो। बिक्री लागत घट्नु नै नाफा वृद्धि हुने मुख्य कारण बनेको हो।

कुल बिक्री आम्दानी सामान्य बढ्दै अघिल्लो वर्षको ७ अर्ब ७० करोड रुपैयाँबाट यस वर्ष ७ अर्ब ७६ करोड रुपैयाँ पुगेको छ। तर, बिक्री लागत भने अघिल्लो वर्षको ६ अर्ब ६६ करोड रुपैयाँबाट घटेर ६ अर्ब ३ करोड रुपैयाँमा झरेको छ। साथै, बैंकको ब्याज घटेकाले वित्तीय लागत पनि अघिल्लो वर्षको ४ करोड ९६ लाख रुपैयाँबाट घटेर यस वर्ष १ करोड रुपैयाँमा पुगेको छ।

कम्पनीको वार्षिक प्रतिसेयर आम्दानी (EPS) १४ रुपैयाँ ५५ पैसा र प्रतिसेयर नेटवर्थ १८८ रुपैयाँ ५७ पैसा रहेको छ। मंगलबार बजार बन्द हुँदा कम्पनीको सेयर मूल्य प्रतिकित्ता ६३३ रुपैयाँ ९० पैसा थियो।