शेयर बजार फेरि दबाबमा

काठमाडौं । जेनजी आन्दोलनपछि केही दिन आंशिक सुधार देखिएको शेयर बजार बुधबार पुनः दबाबमा परेको छ। मंगलबारसम्म १७० अंकको सुधार गर्दै लगानीकर्तामा आशा जगाएको नेप्से परिसूचक बुधबार भने २७.८९ अंकले घटेर २६५४.३५ बिन्दुमा झ¥यो।

यस दिन कारोबार रकम पनि घट्यो। मंगलबार ५ अर्ब रुपैयाँभन्दा बढीको कारोबार भएको बजारमा बुधबार ४ अर्ब १२ करोड रुपैयाँबराबरको मात्र किनबेच भयो। विश्लेषकहरूका अनुसार नाफा सुरक्षित गर्ने प्रवृत्ति र दशैं खर्च व्यवस्थापनका कारण बजारमा बिक्रीको चाप बढेको हो।

उपसमूह र कम्पनीगत स्थिति

नेप्सेका १३ उपसमूहमध्ये होटल तथा पर्यटन र म्युचुअल फण्ड मात्र हरियो देखिए भने बाँकी ११ उपसमूह राताम्मे भए।

• सकारात्मक प्रदर्शन: माथिल्लो मैलुङ खोल जलविद्युत, सिटी होटल र हिम स्टार उर्जा कम्पनी सर्किट लेभलमा पुगे।

• नकारात्मक प्रदर्शन: उन्नती सहकार्य लघुवित्त ५.३८% घट्दै सबैभन्दा कमजोर देखियो।

कारोबार रकममा युनियन हाइड्रोपावर अग्रस्थानमा रह्यो, जसको २२ करोड १३ लाख रुपैयाँ बराबरको कारोबार भयो। दोस्रो स्थानमा नेपाल पुनर्बीमा कम्पनी करिब १७ करोड रुपैयाँको कारोबारसहित रह्यो।

प्राविधिक विश्लेषण

प्रविधिक विश्लेषक अजित खनालका अनुसार बजारले ३८.२% रिट्रेसमेन्ट लेबल (२६९२ बिन्दु) मा पुगेर नकारात्मक प्रतिक्रिया देखाएको छ। हाल परिसूचक २०० दिने मूभिङ एभरेज भन्दा तल रहे पनि यसलाई पार गर्ने प्रयास भइरहेको छ।
यदि बजारले यो स्तर माथि स्थायित्व बनाउन सक्यो भने आत्मविश्वास पुनः बढ्न सक्ने उनको भनाइ छ।

तर, कारोबार रकम घट्नु बजारको कमजोरी मानिएको छ। ६% नकारात्मक सर्किट लागेका दिनबाहेक पौष २८ यताकै कम कारोबार बुधबार देखियो। दिउँसो १२ः१० बजेपछि बजार लगातार नयाँ लो बनाउँदै झरेको थियो।

क्षेत्रगत कारोबार

जलविद्युत कम्पनीका ठूला स्टकहरूमा बिक्री चाप बढ्दा हाइड्रोपावर समूहको कारोबार हिस्सा ४०% भन्दा माथि पुग्यो।
त्यस्तै, विकास बैंक समूहको कारोबार हिस्सा पनि १०% भन्दा बढी रह्यो।

ब्रोकर कारोबार विश्लेषण

१० ठूला ब्रोकर कम्पनीमध्ये सात ब्रोकरले खरिदभन्दा बढी बिक्री गरेका छन्। यसले छोटो अवधिका लगानीकर्ताले नाफा सुरक्षित गर्न प्राथमिकता दिएको प्रष्ट देखाउँछ।

जेनजी आन्दोलनपछिको भारी गिरावटपछि दुई दिन सुधार देखिएको बजार बुधबार फेरि दबाबमा परेको छ। दशैं खर्च व्यवस्थापन र नाफा सुरक्षित गर्ने प्रवृत्तिले बजारलाई अस्थिर बनाइरहेको छ। आगामी दिनमा बजारको दिशा २०० दिने मूभिङ एभरेज माथि स्थायित्व बनाउन सक्ने/नसक्ने कुराले निर्धारण गर्नेछ।