साउनमा थोक मुद्रास्फीति २.३७ प्रतिशत, उपभोक्ता मुद्रास्फीति १.६८ प्रतिशतमा सीमित

काठमाडौं, भदौ — नेपालमा आर्थिक वर्ष २०८२/८३ को पहिलो महिनामा मुद्रास्फीति नियन्त्रणमा देखिएको छ। नेपाल राष्ट्र बैंकले सार्वजनिक गरेको तथ्याङ्कअनुसार साउन महिनामा वार्षिक विन्दुगत थोक मुद्रास्फीति २.३७ प्रतिशत मात्र रह्यो। गत वर्ष सोही महिनामा यो दर ३.६६ प्रतिशत रहेको थियो।

समीक्षा अवधिमा उपभोग्य वस्तुको थोक मुद्रास्फीति ६.५७ प्रतिशत रहेको छ। त्यसैगरी, मध्यवर्ती वस्तुमा ०.१२ प्रतिशत र पुँजीगत वस्तुमा २.९६ प्रतिशत को मुद्रास्फीति देखिएको छ। निर्माण क्षेत्रमा प्रयोग हुने सामग्रीतर्फ भने उल्लेखनीय वृद्धि भएको छ, जसमा थोक मूल्य सूचकाङ्क ४.०८ प्रतिशतले बढेको राष्ट्र बैंकले जनाएको छ।

यस्तै, २०८२ साउन महिनामा नेपालको उपभोक्ता मुद्रास्फीति १.६८ प्रतिशत मात्र रहेको छ। गत वर्ष सोही महिनामा यो दर ४.०९ प्रतिशत थियो। मूल्य वृद्धि दर घट्नु उपभोक्ताका लागि राहत मानिएको छ।

छिमेकी मुलुक भारतमा भने २०२५ अगस्ट महिनामा उपभोक्ता मुद्रास्फीति २.०७ प्रतिशत देखिएको छ। यसरी हेर्दा नेपालमा मुद्रास्फीति भारतभन्दा पनि कम रहँदा हालको अवस्थामा दुवै मुलुकमा मूल्य स्थिरता देखिएको छ।

अर्थतन्त्रका जानकारहरूका अनुसार थोक मुद्रास्फीति घट्नु आपूर्ति सुधार, कृषि उत्पादन वृद्धि र आयातमा सहजताका कारण हो। तर, निर्माण सामग्री महँगो भइरहनु आगामी महिनामा पूँजीगत खर्च बढ्दा निर्माण लागतमा दबाब सिर्जना हुने सम्भावना रहेको बताइन्छ।
समग्रमा, थोक र उपभोक्ता दुवै मुद्रास्फीति न्यून स्तरमा सीमित रहनु अर्थतन्त्रको स्थिरताका लागि सकारात्मक संकेत भए पनि उत्पादन र आयातमा निर्भरता कायमै रहेकाले दीर्घकालीन चुनौती कायम नै रहने विश्लेषण गरिएको छ।