१ अर्बको डिबेन्चर निष्कासन सँगै सिदार्थ बैंकको वित्तीय क्षमता विस्तार

सिदार्थ बैंक लिमिटेडले कुल १ अर्ब रुपैयाँ बराबरको डिबेन्चर "१०% सिदार्थ बैंक डिबेन्चर २०९०" नाममा निजी स्थान (Private Placement) बाट जारी गरी सफलतापूर्वक निष्कर्ष निकालेको छ। बैंकले कुल १० लाख इकाई डिबेन्चर प्रतिइकाई रू. १,००० अंकित मूल्यमा ७ वर्षको अवधिका लागि १० प्रतिशत निश्चित ब्याजदरमा जारी गरेको हो। यस डिबेन्चर सर्वसाधारणका लागि नभइ संस्थागत लगानीकर्ताहरूलाई लक्षित गरी जारी गरिएको हो।

उक्त डिबेन्चरलाई ICRA नेपालले "ICRANP IR BBB+" को रेटिङ प्रदान गरेको छ, जसले वित्तीय दायित्व समयमै तिर्ने मामिलामा मध्यम सुरक्षा रहेको जनाउँछ, यद्यपि यो रेटिङ हाल नकारात्मक संकेतसहित निगरानीमा रहेको छ। यस डिबेन्चरको निष्काशन व्यवस्थापकको रूपमा एनएमबी क्यापिटल लिमिटेड रहेको थियो। बैंकले आवश्यक नियामक प्रक्रिया पूरा गर्दै ड्यु डिलिजेन्स प्रमाणपत्र, ट्रस्टी सम्झौता, र डिबेन्चर रिडेम्प्शन रिजर्भको विवरण समेत पूँजी बजार बोर्ड (SEBON) मा बुझाएको छ। यो डिबेन्चर निष्काशनले बैंकको दीर्घकालीन पूँजी संरचना सुदृढ गर्न, तरलता व्यवस्थापन सुधार गर्न र पूँजी पर्याप्तता अनुपात वृद्धि गर्न मद्दत गर्ने अपेक्षा गरिएको छ।