जोशी हाइड्रोपावरलाई ६५ प्रतिशत हकप्रद शेयर निष्काशनको अनुमति

नेपाल धितोपत्र बोर्डले जोशी हाइड्रोपावर डेभलपमेन्ट कम्पनी लिमिटेडलाई हकप्रद शेयर निष्काशनको अनुमति प्रदान गरेको छ। सोमबार बोर्डले कम्पनीलाई चुक्ता पूँजीको ६५ प्रतिशत हकप्रद शेयर निष्काशन गर्ने अनुमति दिएको हो।

यो स्वीकृतिसँगै कम्पनीले अब २४ करोड १४ लाख १० हजार रुपैयाँ बराबरको २४ लाख १४ हजार १ सय कित्ता हकप्रद शेयर निष्काशन गर्नेछ। कम्पनीको हालको चुक्ता पूँजीअनुसार ६५ प्रतिशतको अनुपातमा शेयर जारी गरिने भएको हो।

शेयर निष्काशनको प्रक्रिया व्यवस्थापन गर्नका लागि कम्पनीले लक्ष्मी क्यापिटल मार्केट लिमिटेडलाई बिक्री प्रबन्धकको रूपमा नियुक्त गरिसकेको छ। अब निकट भविष्यमा कम्पनीले हकप्रद निष्काशनको मिति, बुकक्लोज र आवेदन प्रक्रिया सम्बन्धी सूचना सार्वजनिक गर्नेछ।

उल्लेखनीय छ, हकप्रद शेयर भनेको हालका शेयरधनीले आफ्नै स्वामित्व प्रतिशतको आधारमा अतिरिक्त शेयर खरीद गर्न पाउने अधिकार हो, जुन कम्पनीले पूँजी वृद्धि गर्नका लागि ल्याउने गर्दछ।