मिथिला लघुवित्तको चौथो त्रैमासमा ८ करोडभन्दा बढी नाफा

मिथिला लघुवित्त वित्तीय संस्था लिमिटेड (MLBBL) ले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। सार्वजनिक विवरण अनुसार कम्पनीको आम्दानी तथा मुनाफा सबै सूचकहरूमा उल्लेख्य वृद्धि देखिएको छ।

गत वर्षको तुलनामा लघुवित्तको खुद नाफा ७७ प्रतिशतले बढेर ८ करोड ४१ लाख रुपैयाँ पुगेको छ। अघिल्लो आर्थिक वर्षको सोही अवधिमा कम्पनीले ४ करोड ७५ लाख रुपैयाँ मात्र नाफा आर्जन गरेको थियो।

नाफामा देखिएको यो उछालको मुख्य कारण भनेको खुद ब्याज आम्दानीमा ४१.८६ प्रतिशत र अन्य सञ्चालन आम्दानीमा ३४.९१ प्रतिशत वृद्धि हुनु हो। यसैगरी, कुल सञ्चालन आम्दानीमा ४०.३६ प्रतिशत र सञ्चालन मुनाफामा १०७.६८ प्रतिशत को भारी वृद्धिले संस्थाको समग्र आर्थिक अवस्था सुदृढ बनाएको छ।

प्रति शेयर आम्दानी (EPS) पनि १३ रुपैयाँ ३२ पैसाले बढेर ३७.५८ रुपैयाँ पुगेको छ। प्रति शेयर नेटवर्थ १९१.२९ रुपैयाँ रहेको छ भने मूल्य आम्दानी अनुपात (PE Ratio) ४२.५५ गुणा पुगेको छ।

वित्तीय संरचना हेर्दा, संस्थाको चुक्ता पूँजी २२ करोड ३९ लाख रुपैयाँ रहेको छ भने जगेडा कोषमा २० करोड ४४ लाख रुपैयाँ सञ्चित गरिएको छ। यस अवधिमा, १ अर्ब ७७ करोड रुपैयाँ कर्जा लिइएको र १ अर्ब १८ करोड रुपैयाँ निक्षेप संकलन गरी २ अर्ब ९६ करोड रुपैयाँ कर्जा प्रवाह गरिएको उल्लेख छ।

मूल्यांकन गर्दा, मिथिला लघुवित्तले वित्तीय सूचकहरूमा देखाएको सुधार लगानीकर्ताका लागि सकारात्मक संकेत हो।